یەکگرتووی ئیسلامی لەبارەی پەیامەکەی سەرۆک بارزانی: بێ پارتی هەڵبژاردن ناکرێت

ئاڤا نیوز

گوتەبێژی یەکگرتووی ئیسلامیی کوردستان هەرچەندە هەڵبژاردن بۆ دۆخی ئێستای هەرێمی کوردستان بە چارەسەر دەزانێت، بەڵام جەخت دەکاتەوە کە بێ بەشداریکردنی پارتی پرۆسەکە ناکرێت.

وێنە گەورەکە: نوێترین پەیامی سەرۆک بارزانی لەبارەی پرۆسەی هەڵبژاردن کاردانەوەی لایەنەکانی لێکەوتەوە و زۆربەیان لەگەڵ ئەوە دان بێ پارتی هەڵبژاردن ناکرێت.

لێدوانی فەرمی: خەلیل ئیبراهیم، گوتەبێژی یەکگرتووی ئیسلامیی کوردستان بە ئاڤا نیوزی گوت: "هەڵبژاردن بۆ ئەو قۆناغە ناهەموارەی ئێستا ڕووبەرووی هەرێمی کوردستان بووەتەوە تاکە چارەسەرە، بۆیە ئومێدەوارین هەڵبژاردن لە وادەی دیاریکراوی خۆیدا بکرێت".

کاریگەریی و لێکەوتەکان: گوتەبێژی یەکگرتوو جەختی کردەوە، "سروشتی هەرێمی کوردستان وایە، ئەگەر پارتی و یەكێتی بەشداریی هەڵبژاردن نەکەن ئەوا پرۆسەکە ناکرێت، لە بەرامبەردا کشانەوەی هەر لایەنێکی دیکە کاریگەرییەکی ئەوتۆی نابێت." 

باکگراوند: سەرۆک بارزانی ئەمڕۆ شەممە لە میانی کۆبوونەوەیدا  لەگەڵ ئەلینا ڕۆمانسکی، باڵیۆزی ئەمریکا لە عێراق، نیگەرانی پارتی لەبارەی شێوازی هەڵبژاردن دووپاتکردەوە و ڕایگەیاند: "هەڵبژاردن بە دەستوەردانی نایاسایی و ئەجێندای دەرەکی و  بێ بەشداریکردنی پێكهاتەكان ناكرێت".