سێ کەس لە کاتی ڕاوکردن لە سنووری ئاغجەلەر دەستگیر کران

ئاڤا نیوز

 

لە سنووری گوندی گەڕاو سەر بە ناحیەی ئاغجەلەر، سێ هاووڵاتی لەلایەن پۆلیسی دارستان و ژینگەی سلێمانییەوە بە تۆمەتی ڕاوکردن دەستگیر کران.

 

لێدوانی فەرمی: عەمید هێمن، کەمەرخان، وتەبێژی بەڕێوەبەرایەتیی پۆلیسی دارستان و ژینگەی سلێمانی، بە ئاڤا میدیای ڕاگەیاند، پەڕاوی لێکۆڵینەوە بۆ ئەو کەسانە کراوەتەوە و لەلایەن دادوەرەوە ئاگادارکردنەوەیان پێدەدرێت بۆ ئەوەی دووبارە ئەو کارە نەکەنەوە.

لەلایەکی دیکە: لەگەڵ دەستگیرکردنیان، دەست بەسەر یەک چەکی جۆری تاپڕ و نۆ فیشەک و دوو لایت و ئۆتۆمبێلێکدا گیراوە.

 

ئەوەی پێویستە بیزانیت: ئەو چەکانەی دەستیان بەسەردا دەگیرێت بە فەرمانی دادوەر ڕەوانەی بەڕێوەبەرایەتی پۆلیسی دارستانی هەرێمی کوردستان دەکرێن، ئەگەر جۆری چەکەکان جیاواز بن، دادوەر بۆ وەزارەتی پێشمەرگەی دەگەڕێنێتەوە.