یەکگرتوو: داوامان لە پارتی و یەکێتی کردووە دەنگ بە کاندیدی ئێمە بۆ سەرۆککۆمار بدەن

ئاڤا نیوز

وتەبێژی یەکگرتووی ئیسلامی ئاشکرای دەکات، بەهۆی ڕێکنەکەوتنی پارتی و یەکێتی لەسەر یەک کاندید، ئەوان کاندیدی خۆیان بۆ پۆستی سەرۆککۆمار هەیە و داوای پشتگیری لەو دوو حیزبە دەکەن.

وێنە گەورەکە: دوای نزیکەی سێ مانگ لە هەڵبژاردنەکان و چەندین دانیشتنی پەرلەمان، تا ئێستا کاندیدێک بۆ پۆستی سەرۆککۆماری عێراق یەکلا نەکراوەتەوە، کە بە پێی عورفی سیاسی ئەو پۆستە بۆ کوردە، لەنێو کوردیش چەندین کاندید هەن و کێبڕکێ دەکەن.

لێدوانی فەرمی: د. سەڵاحەددین بابەکر، کارگێڕی مەکتەبی سیاسی و وتەبێژی یەکگرتووی ئیسلامیی کوردستان، بە ئاڤای ڕاگەیاند: داوامان لە پارتی و یەکێتی کردووە ئەگەر لەسەر کاندیدێک ڕێکنەکەون، با پشتگیری لە کاندیدەکەی ئێمە بکەن.

ئاماژەی بەوەش کرد، کاندیدەکەی ئەوان لێهاتووە و پەیوەندییەکی باشی لەگەڵ لایەنە شیعە و سوننەکان هەیە، پێشبینیش دەکەن لە دانیشتنی یەکەمدا دەنگێکی باش بهێنێت.

زانیاریی زیاتر: بابەکر جەختی کردەوە، پێویستە کورد بە یەکدەنگی بچێتە بەغدا تاوەکو لایەنە عێراقییەکان بڕیار لەسەر پۆستەکان نەدەن.

گۆشەیەکی دیکەی دیمەنەکە: سەبارەت بە پۆستی سەرۆکی ئەنجوومەنی وەزیرانی عێراق، وتەبێژی یەکگرتووی ئیسلامیی کوردستان، ئاماژەی بەوە کرد: پێمان وایە نووری مالیکی نابێتە سەرۆکوەزیرانی عێراق لەبەر قسەکەی ترەمپ، لە کۆتایدا چوارچێوەی هەمانگی هەوڵدەدەن مالیکی دەستبەرداری کاندیدی سەرۆکوەزیران بێت ئینجا بە هەڵبژاردن بێت یان بە شێوازی دیکە.