پارتی و یەکێتی هەنگاوەكانی پێكهێنانی كابینەی 10ـی حكومەت خێراتر دەکەن

ئاڤا نیوز

پارتی و یەکێتی دەست بە کۆبوونەوەکانیان دەکەنەوە و هەنگاوەکانی پێکهێنانی کابینەی 10ـی حکومەت خێراتر دەکرێت. 

چیرۆکی سەرەکی: شاندی دانوستانکاری پارتی دیموکراتی کوردستان و یەکێتیی نیشتمانیی کوردستان بەمزووانە دەست دەکەنەوە بە گفتوگۆکانیان بەمەبەستی تەواوکردنی ڕێککەوتنی نێوانیان سەبارەت بە پێکهێنانی کابینەی 10ـی حکومەتی هەرێمی کوردستان. هەردوولا لەسەر زۆرێک لە خاڵەکان ڕێککەوتوون و لە کۆبوونەوەی داهاتوودا گفتوگۆ لەسەر ئەو خاڵانە دەکەن کە تاوەکوو ئێستا لەسەری ڕێککنەکەوتوون.

زانیاریی بەدەستهاتوو: پارتی و یەکێتی لیژنەی تایبەتیان بۆ پرسی پێکهێنانی حکومەت هەیە، دوو تەوەر گفتوگۆیان لەسەر دەکرێت. یەکێکیان بریتییە لە چۆنیەتی پێکهێنانی کابینەی تازە و ئەو بنەمایانەی کە لەسەری پێکدەهێنرێت. لیژنەکان لەسەر سەرجەم بنەماکان ڕێککەوتوون، ئەوەی ماوەتەوە پۆستەکانە.

لەلایەکی دیکەوە: هەردوولا ڕێککەوتوون لەسەر ئەوەی کە ئەم مانگە، خولی شەشەمی پەرلەمانی کوردستان دەست بە کار و چالاکیی ئاسایی و یاساییی خۆی بکات و سەرۆکایەتیی پەرلەمانی کوردستان هەڵببژێردرێت و هەنگاوەکانی تری پێکهێنانی کابینەی نوێ بهاوێژرێن.