یادی لە دایکبوونی پێغەمبەر (د.خ) دەکرێتەوە

ئاڤا نیوز

بەبۆنەی یادی لە دایکبوونی پێغەمبەر محەممەد (د. خ) لە هەرێمی کوردستان بە تایبەت لە شاری هەولێر چەندین چالاکی و مولوود خوێندنەوە دەکرێت و ئەو یادە بەرز ڕادەگیرێت.

وێنە گەورەکە: 12ـی ڕەبیع ئەلئەوەل لە ساڵنامەی کۆچی یادی لە دایکبوونی پێغەمبەر محەممەدە (د.خ)، ساڵانە ئەو ڕۆژە لە وڵاتانی ئیسلامی دەکرێتە پشوو، موسڵمانانیش لە سەرتاسەری جیهان بە شێوازی جیا و بە چوونە مزگەوت و مەولوود خوێندنەوە و بەخشینەوەی خێر و شیرینی یادی ئەو ڕۆژە دەکەنەوە.

بەپێی بەڵگەنامە و گێڕانەوە مێژوویەکان بۆ یەکەمجار لەسەر دەستی سوڵتان موزەفەرەددین کۆکەبەری، حاکمی هەولێر لە سەردەمی سوڵتان سەڵاحەددین ئەیوبی، یادی لە دایکبوونی پێغەمبەر کراوە و مەلوود خوێنراوەتەوە، لەو کاتەوە تا ئێستا بەردەوام ئەو یادە لە هەرێمی کوردستان بەرز ڕاگیراوە.

لێدوانی فەرمی: ئومێد خۆشناو، پارێزگاری هەولێر ڕایگەیاند: یادی لە دایکبوونی پێغەمبەر (د.خ) بووەتە بەشێکی گرنگ لە مێژوو و کولتووری شاری هەولێر و کوردستان و وڵاتەکەمان، ئێمە بەردەوام دەبین لە پارێزگاریکردن لەو شوناسە جوانەی شارەکەمان.

زانیاریی زیاتر: لە سەرتاسەری هەرێمی کوردستان یادی لە دایکبوونی پێغەمبەر(د.خ)  دەکرێتەوە، بەڵام لە هەولێر یادەکە بووەتە بەشێکی کولتووری شارەکە، هەموو ساڵێک بە کۆبوونەوە لەبەردەم قەڵای هەولێر، بەخشینەوەی شیرینی، خوێندنەوەی مەولوود، دەف لێدان و سروودی ئاینی، سەردانی مزگەوتەکان، خوێندنەوەی قورئان و سەلاوات لێدان ئەو یادە دەکرێتەوە.