کۆنگرێسمانێکی ئەمریکا: ترەمپ پشتیوانی دارایی بۆ میلیشیا عێراقییەکان قەدەغە دەکات

ئاڤا نیوز

ئەندامێکی کۆنگرێسی ئەمریکا ڕایدەگەیەنێت، ئەو کارەی کە جۆو بایدن نەیکرد، سەرۆک ترەمپ دەیکات و هەموو هاوکارییەکی دارایی لە گرووپە میلیشیاکانی نزیک لە ئێران قەدەغە دەکات.

وێنە گەورەکە: ئەمریکا لە هەوڵەکانی بەردەوامە بۆ دابڕینی دەسەڵات و هەژموونی ئێران بەسەر عێراقدا، واشنتن بە هەموو شێوەیەک پشتیوانی حکومەتی عێراق و کارئاسانی بۆ ئەو گرووپانە ڕەت دەکاتەوە. لە دوایین هەنگاودا ئەندامێکی کۆنگرێسی ئەمریکا ڕایدەگەیەنێت، دۆناڵد ترەمپ هاوکاری دارایی ڕاستەوخۆ و ناڕاستەوخۆ بۆ ئەو گرووپانە قەدەغە دەکات.

بڵاوکراوەی فەرمی: جۆی ویڵسۆن، ئەندامی ئەنجومەنی نوێنەرانی ئەمریکا ئەمڕۆ پێنجشەممە لە ئەکاونتی تایبەتی خۆی لە پلاتفۆرمی ئێکس ڕایگەیاند: لە ماوەی دوو ساڵی ڕابردوودا کۆنگرێس قەدەغەکردنی دارایی بێ پێشینەی ڕاستەوخۆ و ناڕاستەوخۆ  لەسەر میلیشیا عێراقییە نزیکەکانی ئێران لە عێراق کردە یاسا، بۆ ماوەی چەند ساڵی ڕابردوو پشتگیری ئەم پرۆژەیە بووم کە دەبێت هەموو هاوکارییەکی ڕاستەوخۆ و ناڕاستەوخۆ بۆ ئەو گرووپانە ڕابگیرێن، بەڵام ئیدارەی بایدن ڕەتیکردەوە ئەم یاسایە جێبەجێ بکات.

وێلسن باس لەوەش دەکات، ئەم یاسایە ئێستا ئامرازێکی گەورەیە بۆ سەرۆک ترەمپ بۆ بڕینی دارایی بۆ هەر گرووپێکی تیرۆریستی کە ڕاستەوخۆ یان ناڕاستەوخۆ پەیوەندی بە ئێرانەوە هەیە لە عێراق یان هەر شوێنێکی تر و لەم قۆناغە بەدواوە سەرۆک ترەمپ خۆی چاکی دەکات.

باکگراوند: پێشتر جۆی ویڵسۆن چەند جارێکی دیکە داوای کردبوو کە هاوکارییە داراییەکانی ئەمریکا بۆ عێراق ڕابگرن، چونکە ئەو هاوکارییانە دەدرێن بە میلیشیاکانی نزیک لە ئێران و دەبنە هۆی تێکدانی ئاسایش و سەقامگیری ناوچەکە.