لە کۆبوونەوەی حکومەتی لوبنان لەبارەی چەکداماڵینی حیزبوڵڵا وەزیرانی شیعە کشانەوە

ئاڤا نیوز

بۆ چەکداماڵینی حیزبوڵڵا، سەرەتای مانگی ئابی ڕابردوو، حکومەتی لوبنان، ئەرکی ئامادەکردنی پلانێکی خستە ئەستۆی سوپای لوبنان، ئەم بڕیارەش بەهۆی فشارەکانی ئەمریکا و هەڕەشەکانی ئیسرائیل بۆ دەستپێکردنی هەڵمەتێکی سەربازی نوێ هاتووە لەبەرامبەردا سوپای ئیسرائیل لە پێنج ناوچەی لوبنان دەکشێنەوە.

چیرۆکی سەرەکی: ئەمڕۆ هەینی، حکومەتی لوبنان دانیشتنێکی بە سەرۆکایەتی جۆزێف عەون، سەرۆککۆماری لوبنان بەڕێوەبرد و پلانی چەکداماڵینی حیزبووڵا تاوتوێ کرا. وەزیرانی سەر بە حیزبوڵڵا و بزووتنەوەی ئەمەل، لە دانیشتنەکە کشانەوە.

لێدوانی فەرمی: بۆل مەرقەس، وەزیری ڕاگەیاندنی لوبنان لە کۆنگرەیەکی ڕۆژنامەوانی دوای کۆبوونەوەکەی حکومەت ڕایگەیاند: ئەنجوومەنی وەزیران پێشوازیی لە پلانەکەی سەرکردایەتیی سوپا کرد سەبارەت بە چەکداماڵین، سوپا هەموو مانگێک ڕاپۆرتی هەنگاوەکانی چەکداماڵین دەداتە حکومەت.

زانیاریی بەدەستهاتوو: کەناڵی "ئەلعەرەبییە" لە چەند سەرچاوەیەوەکە بڵاویکردەوە، وەزیرانی شیعە بیر لە دەستلەکارکێشانەوە لە حکومەتی لوبنان دەکەنەوە، هاوکات فادی مەکی، وەزیری سەربەخۆ دەستلەکارکێشانەوەی خۆی خستووەتە بەر دەستی سەرۆککۆمار.

زانیاریی زیاتر: یاسین جابر، وەزیری دارایی و تەمارا زین، وەزیری ژینگە لە بزووتنەوەی ئەمەل، ڕکان ناسرەدین، وەزیری تەندروستی و محەممەد حەیدەر، وەزیری کار لە حیزبوڵڵا کشانەوە، هەروەها فادی مەکی، وەزیری گەشەپێدانی کارگێڕی کشایەوە.

ئەمەش بزانە: حکومەتی لوبنان لە 24 وەزیر پێکدێت، پێنجیان شیعە مەزهەبی نزیک لەحیزبوڵلا و بزووتنەوەی ئەمەلن، لە مانگی ئابی ڕابردوودا، وەزیرە شیعەکان لە دانیشتنی حکومەت کە بۆ گفتوگۆکردن لەسەر چەکداماڵینی حیزبوڵڵا تەرخانکرابوو کشانەوە.