(پێشمەرگە) لە ناو دڵی (پاریس) دا؛ چیرۆکی ئازایەتی و مەردایەتی

لە ناو دڵی پاریسەوە، لە ئاسمانی شاری ڕووناکی و ئازادیدا، بە کردنەوەی کۆریدۆر و باخچەیەک بە ناوی (پێشمەرگە)وە، ئاڵایەکی دیکەی کەرامەتی مرۆڤایەتی شەکایەوە. چەند سەدەیەکە شەقام و پارکەکانی پاریس ئاوێتەی مێژووی خەباتی ئازادین، لەمڕۆ بەدواوە ناوی پیرۆزی پێشمەرگەش دەبێتە هێمایەکی جیهانیی بۆ بەرخۆدانێکی ڕەوا و ئازایەتییەکی کەم وێنە.

ئەوەی لە پاریس گوزەرا، بۆ هەر کوردێکی سەربەرز، چرکە ساتێکی پڕ شانازیی مێژوویی بوو. پێزانینی جیهانی ئازاد بوو بۆ ڕۆڵە ئازاکانی کورد کە لە تاریکترین ڕۆژەکانی مێژوودا نەچەمینەوەو لەبریی هەموو مرۆڤایەتی لە پێناو ژیان و ئازادی و کەرامەتی مرۆڤدا، ڕووبەڕووی دڕندەترین هێزی تیرۆرستی بوونەوە!

 
ئاڵای کوردستان بە شانازییەوە لە ئاسمانی پایتەختی فەرەنسادا، لە نێو گوڵ و گوڵزاری هەردوو لای کۆریدۆرەکەدا دەشەکایەوە و شوناسی زیندوویی و خۆڕاگریی گەلی کوردستانی بۆ هەموو دنیا نمایش دەکرد، گەلێک کە سەدان ساڵە ئازایەتی و مەردایەتیی وەک بەهایەکی ئەخلاقی و ئینسانی، بۆ خۆی هەڵبژاردووە. لە نێو ئاپۆرای ئامادەبووانی ئەو بۆنەیەدا، پێشمەرگەیەکم دەبینی کەمئەندامی شەڕی داعش بوو، چاوەکانی پڕ ئیرادە و سەرنجەکانی پڕ لە شانازی و جەستەیشی چیرۆکێکی  پڕئازار و قوربانیدانی بۆ هەموو دنیای ئازاد دەگێڕایەوە. 

ئامادەبوونی سەرۆک بارزانی لەم بۆنەیەدا تەنیا  میواندارییەکی پرۆتۆکۆلی نەبوو، بەڵکو ڕێزلێنانێکی سیاسیی بەهادار بوو. پاریس کە لانکەی ماف و ئازادییەکانی مرۆڤە ، شەرەفێکی ئەبەدیی بەخشییە (بارزانیی پێشمەرگە) کە بەدرێژایی ساڵانی شەڕی خوێناویی داعش ڕابەری هەموو ئەو پێشمەرگە قارەمانانە بوو کە گیان لەسەردەست بەرگرییان لە ژیان و کەرامەتی مرۆڤ دەکرد. 

ئەم ڕێزلێنانە بۆ پێشمەرگە لەناو دڵی پاریس دا، لە کاتێکدایە  کە فشارێکی نێودەوڵەتیی زۆر بەهێز هەیە بۆ سەر عێراق و لوبنان بۆ داماڵینی چەکی میلیشیاکانی دەرەوەی دەوڵەتی مەدەنی، ئەمەش خۆی لەخۆیدا پەیامێکی ڕوونە بۆ هەموو دنیا  کە: پێشمەرگە هێزێکی شکۆمەند و شەرفمەندە و بۆ پاراستنی گیان و ماڵ و کەرامەتی مرۆڤ دەستی داوەتە چەک، نە میلیشیایە و نە  تیرۆریست و نە دژە مرۆڤە. 

پاریسی دایکی ئازادی، بەم  ڕێزگرتنەی لە پێشمەرگە، قەڵغانێکی تری پۆڵایینی هیوای بە گەلی کوردستان بەخشی!