وەزیری دەرەوەی ئێران لە پەیامێکدا بۆ ترەمپ هۆشداری لە وێرانبوونی ڕۆژهەڵاتی ناوەڕاست دەدات

ئاڤا نیوز

وەزیری دەرەوەی ئێران پەیامێک ئاراستەی سەرۆکی ئەمریکا دەکات و ڕایدەگەیەنێت، ئەگەر ڕێگەی دیپلۆماسی نەگیرێتەبەر، ڕۆژهەڵاتی ناوەڕاست ڕووبەڕووی دۆخێکی وێرانکەر دەبێتەوە.

وێنە گەورەکە: دوای " جەنگی 12 ڕۆژە" ی نێوان ئیسرائیل و ئێران و بەشداری ئەمریکا بە هێرشکردنە سەر پێگە ئەتۆمییەکانی "نەتەنز، فۆردۆ و ئەسفەهان"، واشنتن بەردەوام هەوڵ دەدات ئێران بگەڕێنێتەوە سەر مێزی گفتوگۆ و دانوستاندن، بەڵام تاران مەرجی هەیە بۆ کۆبوونەوە و تاوەکو ئێستا ڕازی نەبووە بگەڕێتەوە بۆ دانوستاندن.

لێدوانی فەرمی: عەباس عێراقچی، وەزیری دەرەوەی ئێران لە چاوپێکەوتنێکدا لەگەڵ ڕۆژنامەی گاردیان هۆشداری دەدات لە وێرانبوونی ڕۆژهەڵاتی ناوەڕاست لە ئەگەری هێرشی ئیسرائیل و ئەمریکا بۆ سەر ئێران و ڕایگەیاندووە: ئەگەر هەوڵە دیپلۆماسییەکان بۆ گەیشتن بە ڕێککەوتن شکست بێنن، دەرئەنجامی زۆر ترسناکی دەبێت و وێرانکەر دەبن بۆ ڕۆژهەڵاتی ناوەڕاست، ئەگەر دۆناڵد ترەمپ، سەرۆکی ئەمریکا لەگەڵ ئەورووپا دەیانەوێت ناکۆکییەکان چارەسەر بکرێت لەگەڵ ئێران، دەبێت ڕێگەی دیپلۆماسی بگرنەبەر و کاتی پێویستی پێبدەن، نابێت بیر لە بژاردەی دەرەوەی دیپلۆماسی بکەنەوە.

وەزیری دەرەوەی ئێران لە بەشێکی وتەکانیدا ئامادەیی ئێرانی بۆ چارەسەری دیپلۆماسی دەربڕیووە و ڕایگەیاندووە،  تاران ئامادەیە ڕێککەوتنامەیەکی ڕاستەقینە و هەمیشەیی ئەنجام بدات و پیتاندنی یۆرانیۆم لە ژێر چاودێری ئاژانسی نێودەوڵەتیی وزەی ئەتۆم بێت، بەڵام دەبێت سزاکانی سەر ئێران هەڵبگیرێن.