لە مانگێكدا 7 خانمە چالاكوانی ئێران دەستگیركراون و پێنجی دیكەش حوكمدراون

ئاڤا نیوز

تەنیا لە مانگی ئابی ڕابردوودا، حەوت ژنە چالاكوانی ئێران دەستگیر كراون كە یەكێكیان كوردە و خەڵكی شاری مەریوانە، پێنج خانمە چالاكوانی دیكەش لەلایەن دەزگای دادوەریی ئێرانەوە، سزای بەندكردنیان بەسەردا سەپێنراوە، سەرجەمیشیان بە تۆمەتی سیاسی حوكمدراون.

وێنە گەورەكە: دەستگیركردن و سزادانی خانمان لە ئێران لە حاڵەتەوە بووەتە دیاردە، بەتایبەت دوای شۆڕشی "ژن، ژیان، ئازادی" فشارەكان لەسەر خانمانی چالاكوان قەبارەیەكی بەربڵاوتری بەخۆیەوە بینیوە، بە وتەی ڕێكخراو و ناوەندەكانی داكۆكیكار لە مافەكانی مرۆڤ، كۆماری ئیسلامی ئێران بەشێوەیەكی ڕێكخراوەیی و پیلان بۆ داڕێژراو، هەوڵ بۆ بەرتەسكردنەوەی ئازادییەكان و سنوورداركردنی چالاكی ژنان دەدات.

لێدوانی فەرمی: ئەرسەلان یارئەحمەدی، سەرۆكی ڕێكخراوی هەنگاو تایبەت بە ئاڤا ڕایگەیاند، لە ماوەی مانگی ئابی ڕابردوودا، حەوت چالاكوانی ژن دەستگیركراون كە یەكێكیان خانمێكی كوردی تەمەن 18 ساڵەیە بە ناوی 'ژینۆ كەریمی' و خەڵكی شاری مەریوانە و ئێستا لە گرتووخانەی شاری سنە گیراوە.

باسی لەوەشكرد پێنج خانمە چالاكوانی دیكەش لەلایەن دەزگای دادوەرییەوە، بە تۆمەتی سیاسی سزای بەندكردنیان بەسەردا سەپێنراوە.

زانیاریی زیاتر: ئەرسەلان  یارئەحمەدی ئاماژەی بەوەشكرد، لە مانگی ڕابردوودا لانیكەم 17 حاڵەتی ژنکوشتن تۆماركراوە كە هیچ كامێكیان لە ڕۆژهەڵاتی كوردستان نین و پێنج ژنیش بە تۆمەتی ماددەی هۆشبەر و كوشتنی بەئەنقەست، لەسێدارە دراون.

ژمارەکان وادەڵێن: ئاماری ڕێکخراوی مافی مرۆڤی هەنگاو دەریدەخات، لە سەرەتای ئەمساڵەوە لە ئێران سزای سێدارە بەسەر 906 بەندکراو جێبەجێکراوە، لەو ژمارەیە 130 بەندکراوی کورد هەن و لەنێویاندا 26 ژن هەن.