لە ئیزمیر هێرش کرایە سەر بنکەیەکی پۆلیس و کوژراو و بریندار هەیە

ئاڤا نیوز

لە شارۆچکەی بالچۆڤای سەر بە پارێزگای ئیزمیر لە تورکیا، هێرشێکی چەکداری کرایە سەر بنکەیەکی پۆلیس، دوو ئەفسەری پۆلیس کوژران و دوو ئەفسەری دیکە برینداربوون یەکێکییان برینەکەی سەختە، هێرشبەرەکە کە تەمەنی 16 ساڵە دەستبەجێ لە شوێنی ڕووداوەکە، دەستگیرکرا. 

بۆچی گرنگە: ئەم ڕووداوە هاوکاتە لەگەڵ گرژییەکانی نێوان حکومەت و ئۆپۆزسیۆن لە ئیستەنبووڵ، دوای ئەوەی قەییووم بۆ سەرۆکی پارێزگای ئیستەنبووڵ دانرا. 

چیرۆکی سەرەکی: میدیاکانی تورکیا باس لەوە دەکەن کە هێرشبەر تەمەنی تەنیا 16 ساڵە و چووەتە بەردەم بنکەی پۆلیسەکە و بەشێوەیەکی هەڕەمەکی هێرشی کردووەتە سەر ئەفسەرانی بنکەکە.

بڵاوکراوەی فەرمی: عەلی یەرلیکایە، وەزیری ناوخۆی تورکیا ڕایگەیاند: سەرەخۆشی لە گەلەکەمان دەکەین، هێرشێکی چەکداری بۆ سەر بنکەی پۆلیسی ئیزمیر ساڵح ئیشگۆرێن ئەنجامدرا.

-دوابەدوای ئەم هێرشە قێزەونە، بەداخەوە "موحسین ئایدەمیر، بەرپرسی پۆلیسی پلە یەکمان. حەسەن ئاکین، ئەفسەری پۆلیسمان شەهید بوون"، هاوکات دوو ئەفسەری پۆلیس بە سەختی برینداربوون. 

- هێرشبەرەکە لە شوێنی ڕووداوەکە بە برینداری دەستگیرکراوە و لێکۆڵینەوە لێی دەستی پێکردووە.
 
- تۆمەتبار لە قۆناغی ئامادەیی دەخوێنێت و هیچ تۆمارێکی تاوانی پێشووی نییە.

لەلایەکی دیکەوە: یڵماز تونج، وەزیری دادی تورکیا لیژنەیەکی ناردووەتە شوێنی ڕووداوەکە و سەرۆکایەتیی داواکاری گشتیی ئیزمیری بۆ لیكۆڵینەوە لە ڕووداوەکە ڕاسپاردووە. 

ئەوەی لەوبارەیەوە دەوترێت: جۆشکون، باشبوگ، پسپۆڕی ئەمنیی دەڵێت: گومان دەکرێت گرووپە چەکدارییەکانی سەر بە "یەپەگە، پەکەکە یان گولەنەکان ئەمەیان کردبێت و سوودییان لە دۆخی ناوخۆیی تورکیا وەرگرتبێت و پلانی هێرشکردنە سەر دەزگا ئەمنییەکانیان ڕێکخستبێت". بەڵام هێشتا لێکۆڵینەوەی دەزگا ئەمنییەکان هیچیان لەبارەی ئەو بۆچوونانە نەخستووەتەڕوو.