سەرۆکوەزیران بارزانی و وەزیری دەرەوەی بەریتانیا لە داڤۆس کۆبوونەوە

ئاڤا دیجیتاڵ

 

ئەمڕۆ پێنجشەممە 18-01-2024 سەرۆکوەزیران بارزانی لە درێژەی ماراسۆنە دیپلۆماسییەکانی لە داڤۆس، لەگەڵ دەیڤد کامیرۆن، وەزیری دەرەوەی شانشینی یەکگرتووی بەریتانیا کۆبووەوە. 

 

بابەتە ستراتیژییەکان: تەوەری سەرەکیى کۆبوونەوەکەی سەرۆکوەزیران بارزانی و وەزیری دەرەوەی بەریتانیا، تاوتوێکردنی هێرشی ئێران بۆ سەر هەولێر بوو.

 

پەرەپێدانی پەیوەندیی دۆستانەی نێوان هەرێمی کوردستان و بەریتانیا، گرنگی چارەسەرکردنی کێشەکانی هەرێمی کوردستان و حکومەتی عێراق، هەروەها دابینکردنی مافە دەستووری و شایستە داراییەکانی هەرێمی کوردستان، تەوەری دیکەی کۆبوونەوەکە بوو.

 

لێدوانی فەرمی: وەزیری دەرەوەی بەریتانیا پرسە و هاوخەمیى خۆی بە سەرۆکوەزیران بارزانی گەیاند و هێرشەکەی "بەتوندی" سەرکۆنە کرد و گوتی: "هێرشەکە هیچ پاساوێکی نییە و دەستدرێژییە بۆ سەروەریى عێراق، ئەمە قبوڵکراو نییە".

 

سەرۆکوەزیران بارزانی سوپاسی هاوخەمی و پشتیوانی بەریتانیای کرد. هەردوولاش هاوڕابوون لەسەر بەردەوامبوونی هاریکاری و هەماهەنگی بۆ ڕووبەڕووبوونەوەی تیرۆریستانی داعش و تیرۆر.

 

باکگراوند: لە پەراوێزی کۆربەندی ئابووریی جیهان لە داڤۆس، سەرۆکوەزیران بارزانی ماراسۆنێکی دیپلۆماسی لەگەڵ سەرۆک و سەرکردە کاریگەرەکانی جیهان ئەنجام دا.