ئاڤای خەڵک؛ زیاتر لە 200 بەركەوتەی چەکی کیمیایی لە بالیسان دوو مانگە مووچەیان بڕدراوە

ئاڤا نیوز

زیاتر لە 200 بەرکەوتووی چەکی کیمیایی لە دۆڵی بالیسان دەڵێن، ماوەی دوو مانگە مووچەکانیان بڕدراوە و هیچ ڕوونکردنەوەیەکی فەرمیشیان پێنەدراوە. چەند بەرکەوتوویەک پەیوەندییان بە ئاڤا کردووە و داوا دەکەن بەدواداچوون بۆ کێشەکەیان بکرێت.

چیرۆکی سەرەکی: بەپێی وتەی بەرکەوتووان، ئەوان ماوەی دوو مانگە مووچەکانیان وەرنەگرتووە و کەسیش هۆکاری ئەم بڕینەی مووچەکانیانی بۆ ڕوون نەکردووەتەوە. ئەمەش بووەتە هۆی دروستبوونی بارگرانییەکی زۆر لەسەر ژیانیان، بەتایبەتی کە زۆربەیان پێویستیان بە چارەسەری بەردەوام و خەرجی پزیشکی هەیە.

بەدواداچوونی ئاڤا: لە وەڵامی داواکاریی بەرکەوتوواندا، ئاڤا پەیوەندی بە نافسەر نووری، بریکاری وەزارەتی کاروباری شەهیدان و ئەنفالکراوانەوە کرد، ئەو ڕایگەیاند، "بەرکەوتووانی چەکی کیمیایی سەرەتا لەلایەن لیژنەی تەندروستییەوە دەبینرێن و بڕیار لەسەر شایستەیی و ڕێژەی بەرکەوتنیان دەدرێت."

بریکاری وەزارەتەکە ڕوونیشی کردەوە: "بەپێی ڕێنمایی ئەنجوومەنی وەزیران و وەزارەتی کاروباری شەهیدان و ئەنفالکراوان، هەر بەرکەوتوویەک ڕێژەی بەرکەوتنی بە چەکی کیمیایی لە 40% کەمتر بێت، مووچەکەی دەبڕدرێت." ناوبراو ئاماژەی بەوەشدا کە "ئەم بەڕێزانەش بەهۆی کەمیی ڕێژەی بەرکەوتنیان بە چەکی کیمیایی، بەپێی هەمان ڕێنمایی مووچەکانیان بڕدراوە."