دوو کەناڵی دیاری تورکیا بە فەرمانی داواکاری گشتیی دەستیان بەسەرداگیرا

ئاڤا نیوز

بە فەرمانی داواکاری گشتیی تورکیا کچووک جێکمەجە، هەر یەکە لە محەممەد شاکر جان، کەمال جان و کێنان تێکداغ، خاوەنەکانی جان هۆڵدینگ و 10 کەسی دیکە دەستگیرکران، هەر لەوچوارچێوەیەدا کەناڵەکانی شۆو تیڤی و هەبار تورک، دەستیان بەسەردا گیرا و خاوەنی هەبار تورک دەستگیرکرا. 

چیرۆکی سەرەکی: لە چوارچێوەی لێكۆڵینەوەکانی داواکاری گشتیی کچووک جێکمەجە، خاوەنەکانی جان هۆڵدینگ و 10 کەسی دیکە  بە تۆمەتی " گەندەڵیکردن، قاچاخچێتی، ساختەکاری و سپیکردنەوەی پارەی ڕەش، دەستگیرکراون.

بڵاوکراوەی فەرمی: داواکاری گشتیی تورکیا ڕایگەیاندووە: ڕێکخراوێک بۆ ئەنجامدانی تاوان لە ڕێگەی کۆمپانیاکانی ژێر دەسەڵاتی جان هۆڵدینگەوە دامەزراوە و لە ڕێگەی ئەم ڕێکخراوەوە کۆمەڵێک ساختەکاری ئەنجام داوە کە بریتی بوون لە خۆدزینەوە لە باج و دانانی داهاتی سەرچاوەی نادیار بۆ ناو حسابی کۆمپانیاکان، هەروەها سپیکردنەوەی داهاتی تاوان.

ئەوەی ئێستا ڕوودەدات: هێزەکانی جەندرمەی تورکیا دەستیان بەسەر هەردوو کەناڵی هەبار تورک و شۆو تی ڤی دا گرتووە، دەرگای کەناڵەکان لەلایەن ‌جەندرمەوە کۆنترۆڵ کراوە. بەڕێوەبەر و کارمەندانی کەناڵەکە هەر لە نێو باڵەخانەی کەناڵ دەستبەسەرکراون.

پێدراوە ڕاستەکان: لە چوارچێوەی لێکۆڵینەوەکاندا کە بە پشتبەستن بە ڕاپۆرتەکانی دەستەی لێکۆڵینەوە لە تاوانە داراییەکان (ماساک) و ئەو ڕاپۆرتانەی لێکۆڵینەوە کە لەلایەن یەکەکانی وردبینی داراییەوە ئامادەکراون دەستیپێکردووە.

زانیاریی زیاتر: لە چوارچێوەی ئۆپەراسیۆنەکەدا دەست بەسەر سەروەت و سامانی 121 کۆمپانیادا گیراوە، سندوقی بیمەی پاشەکەوتی دەوڵەت TMSF وەک قەییووم لە شوێنی خاوەنەکەی موڵکەکان بەڕێوە دەبات.