ئاڤای خەڵک؛ ئاڤا چیرۆکێکی سەیری خێزانێکی هەولێر بڵاو دەکاتەوە؛ پەیوەندی بە فرۆشتنی ئۆتۆمبێل هەیە

ئاڤا نیوز

لە گوندی قەتەوی نزیک هەولێر، چیرۆکێکی ناخۆشی خێزانی دێتە ئاراوە کە تێیدا تاکسییەک بووەتە هۆکاری ناکۆکییەکی قووڵ. ژن و پیاوێک پەیوەندییان بە ئاڤاوە کردووە و داوای یارمەتی دەکەن بۆ چارەسەرکردنی کێشەکەیان.

چی ڕوودەدات: پیاوەکە باس لەوە دەکات کە لە ساڵی 2019 تاکسییەکی کڕیوە بە مەبەستی کاسبی. بەڵام دواتر بەهۆی دۆخێکەوە ناچار بووە لە هەولێر دووربکەوێتەوە و تاکسییەکەی وەک ئەمانەت لای دایکی بەجێهێشتووە. ئەو پێیوابووە تاکسییەکەی لە دەستێکی ئەمیندایە، تەنانەت دایکی پێی ڕاگەیاندووە کە چوار تایەی تاکسییەکەیان لێکردووەتەوە و لەسەر بلۆک ڕایانگرتووە بۆ پاراستنی.

کاتێک پیاوەکە گەڕاوەتەوە بۆ هەولێر، تووشی شۆک بووە کاتێک زانیویەتی دایکی و یەکێک لە براکانی تاکسییەکەیان فرۆشتووە. دوای پرسیارکردن، پێی وتراوە کە برایەکی بە هاوکاری دوو هاوڕێی و بە ئاگاداری دایکی، تاکسییەکەی فرۆشتووە. ئەو پیاوە تاکە هەڵەی خۆی بەوە دەزانێت کە تاکسییەکەی بە ناوی خۆیەوە نەکردبوو، هەرچەندە گرێبەستی کڕینی لەلایە.

بە مەبەستی وەرگرتنەوەی مافی خۆی، پیاوەکە چەندین جار لە پۆلیس و دادگا سکاڵای تۆمار کردووە، بەڵام بە وتەی خۆی، هەموو جارەکان سکاڵاکەی ڕەتکراوەتەوە.

زانیاری بەدەستهاتوو: ژنی ئەو پیاوە باس لەوە دەکات کە کێشەی لەگەڵ خەسووی هەبووە. ئێستا ماڵی خەسووی مەرجێکیان داناوە: نیوەی پارەی تاکسییەکە دەگەڕێننەوە بۆ هاوسەرەکەی، بەڵام دەبێت ئەو تەڵاق بدات. هاوسەرەکەشی بە تووندی ئەم مەرجەی ڕەتکردووەتەوە، ئەمەش کێشەیەکی دیکەی بۆ خێزانەکە دروست کردووە.

لەلایەکی دیکەوە: یەکێک لە براکانی پیاوەکە دانی بەوەدا نا کە ئاگاداری کێشەکەیە و برایەکەی تاکسییەکەی فرۆشتووە، بەڵام وتی کە ئاگاداری وردەکارییەکانی بابەتەکە نییە.

لێدوانی فەرمی: وتەبێژێکی پۆلیسی هەولێر بە ئاڤای ڕایگەیاند: "هەر کەسێک هەر کێشەیەکی هەیە یان هەست دەکات مافی خوراوە، با سەردانی بەڕێوەبەرایەتی پۆلیسی هەولێر بکات. ئێمە کێشەکەیان چارەسەر دەکەین و مافیان بۆ دەگەڕێنینەوە."