کونسوڵخانەی چین لەبارەی "شامپۆ چینییەکە" ڕوونکردنەوە دەدات

ئاڤا نیوز

کونسوڵخانەی چین ڕوونکردنەوە لەبارەی شامپۆی بریملس دەدات و ڕایدەگەیێنێت، پشکنین و بەدواداچوون دەکەن بۆ دۆزینەوەی سەرچاوە و کەناڵی هاوردەکردنی.

چیرۆکی سەرەکی:  بریملس، جۆرە شامپۆییەکی چینییە، سەرەتای ئەمساڵ لە سلێمانی و هەولێر هەستیاری پێستی بۆ دوو هاونیشتمانی دروست کرد، ئەمەش وای کرد بەدواداچوون بۆ ئەم بابەتە بکرێت پشکنینی تاقیگە دەریخست شامپۆکە شیاو نییە بۆ بەکارهێنان چونکە هەستیاری دروستدەکات، بۆیە لە سلێمانی دەست بەسەر بڕێکی شامپۆکەدا گیرا و لە هەولێریش لە بازاڕ کۆدەکرێتەوە و لەنێودەبرێت.

ڕاگەیێنراوی فەرمی: گوتەبێژی کونسوڵخانەی گشتی چین لە هەولێر ڕایگەیاند: "ئێمە سەرنجمان به‌و ڕاپۆرتانە داوه‌ کە لەلایەن هەندێک لە دەزگاکانی ڕاگەیاندن بڵاوكراونه‌ته‌وه‌ سەبارەت بە بەرهەمێکی شامپۆ بە ناوی بریملس "Brimles Herbal-Bubble"، لێره‌دا ده‌مانه‌وێت هاوسۆزی خۆمان بە بەکارهێنه‌رانی ئه‌و به‌رهه‌مه‌ بگەیێنین".

 

زانیاریی زیاتر: کونسوڵخانەی چین ئامادەیی هه‌ماهه‌نگی لەگەڵ لایه‌نه‌ پەیوەندیدارەکانی حکومەتی هەرێمی کوردستان ڕادەگەیێنێت بەمەبەستی زانینی سەرچاوە و کەناڵی هاوردەکردنی ئەو بەرهەمە و زانیاری سەبارەت بە ئەنجامی پشکنینی کواڵیتی.

خاڵە ئەرێنییەکان: کونسوڵخانەی چین جەختی کردووەتەوە کە حکومەتی چین گرنگییەکی زۆر بە کواڵیتی و سەلامەتی کاڵاکانی هەناردەکردنی چین ده‌دات، فه‌رمانگه‌كانی ڕێکخستنی بازاڕ و گومرگ بەتووندی بڕگە پەیوەندیدارەکانی یاسای کۆماری میللی چین سەبارەت بە کواڵیتی بەرهەم بە پشکنینی کاڵای هاوردە و هەناردەکردن جێبەجێ دەکەن.