ئاڤای خەڵک؛ خاوەن زەوییەکانی سێبەردانی هەولێر 20 ساڵە چاوەڕوانی ڕێگەپێدانی بیناسازین

ئاڤا نیوز

بەشێک لە خاوەن زەوییەکانی سنووری سێبەردان لە هەولێر، داوای ڕێگەپێدان لەلایەن شارەوانی دەکەن بۆ ئەوەی بتوانن زەوییەکانیان بکەن بە خانوو، شارەوانیش دەڵێت، داوامان کردووە، بەڵام لەبەر نەبوونی پارە ڕەزامەندی نەدراوە.

چیرۆکی سەرەکی: بەشێکی زۆر لە خاوەن زەوییەکانی سنووری سێبەردانی شاری هەولێر، کە ماوەی 20 ساڵە چاوەڕوانی بڕیاری ڕێگەپێدانی بیناسازین لەسەر زەوییەکانیان، ناڕەزایەتی دەردەبڕن و داوای چارەسەرکردنی کێشەکەیان دەکەن.

لێدوانی فەرمی: محەممەد یوسف، بەڕێوەبەری شارەوانی سێی هەولێر، لە لێدوانێکدا بۆ ئاڤا، ڕایگەیاند "لە کابینەی نۆدا، ڕێگەپێدانمان بە کەرتەکانی هەزاری، دوو هەزاری، سێ هەزاری و بەشێک لە کەرتی 10 هەزاری سێبەردان داوە." وتیشی: "ژمارەی ئەو خانووانەی لەسەر ئەو زەوییانە دروستکراون کەمە. هەرکات ڕێژەی خانووە دروستکراوەکان گەیشتە 25% تا 30%، ئەوا خزمەتگوزاری ئاو و کارەبا و ئاوەڕۆیان بۆ دابین دەکرێت."

زانیاریی زیاتر: سەبارەت بەو کەرتانەی کە تا ئێستا ڕێگەپێدانیان پێنەدراوە، محەممەد یوسف وتی: "دوو ساڵە دەرخستەمان بۆ ڕێگەپێدان بە کەرتەکانی چوار هەزاری تا هەشت هەزاری سێبەردان کردووە و بەرزمان کردووەتەوە، بەڵام لەبەر نەبوونی پارە ڕەزامەندی نەدراوە." ناوبراو دڵنیایی دا کە: "بۆ وەرگرتنی ڕەزامەندی لە ساڵی داهاتووشدا جارێکی دیکە داواکارییەکە پێشکەش دەکەینەوە."