ئاڤای خەڵک؛ وەرزشدۆستانی ناحیەی ڕوڤیا نیگەرانن لە تێکدانی یاریگای گوندەکەیان

ئاڤا نیوز

لە گوندی جوجەری بچووک سەر بە ناحیەی ڕۆڤیای قەزای بەردەڕەش، کە لە ساڵانی نەوەدەکانەوە خاوەنی یاریگایەکی تۆپی پێ و بالە بووە، ماوەی مانگێکە هەردوو یاریگاکە تێکدراون و ستوونی گۆڵ و تۆڕی یاریگای بالەکە شکێنراون و فڕێدراون، ئەمەش ناڕەزایەتی و نیگەرانییەکی زۆری لەلایەن 200 گەنجی گوندەکە لێکەوتووەتەوە.

زانیاریی بەدەستهاتوو: گەنجانی گوندەکە، کە خۆیان بە وەرزش دۆست دەزانن، دەڵێن ئەم دوو یاریگایە تاکە هیوا و شوێنی وەرزشکردنیان بووە لە گوندەکەدا. یەکێک لە گەنجەکان لە لێدوانێکدا بۆ ئاڤا وتی: "هەموو ڕۆژێک یاری بالەمان دەکرد و کاتەکانمان بە یاریکردن لەم دوو یاریگایە بەسەر دەبرد، بەڵام یەکێک لە ئەنجوومەنی گوندەکە، چاوپۆشی لە خاوەن خانوویێک کردووە کە خزمی خۆیەتی، تا سیاجی ماڵەکەی فراوان بکات و هەردوو یاریگاکەش تێکبدات."

لێدوانی فەرمی: مەنهەل مۆفەق، بەڕێوەبەری ناحیەی ڕۆڤیا، لە لێدوانێکدا بۆ ئاڤا، ڕوونیکردەوە: "ئەو خانووە لە ساڵی 2015 دروست کراوە، ئێستا خاوەن خانووەکە دیواری حەوشەکەی فراوان کردووە تاوەکو هاتووەتە نێو یاریگاکە." ناوبراو دڵنیایی دا کە: "ئێمە خاوەن خانووەکەمان ئاگادار کردووتەوە کە دیواری ماڵەکەی دوور بێت لە یاریگاکان و تێکیان نەدات."

جەختیشی لەسەر ئەوە کردەوە: "بەدواداچوون دەکەین بۆ ئەوەی گەنجانی گوندەکە بێبەش نەبن لەم دوو یاریگایە و ڕێگە نادەین یاریگاکان تێکبدرێن."