بەرپرسی ناوچەی خورماتووی پارتی: یەکێک لەوانەی لە نزیک بارەگا تەقەی کرد کارمەندی هێزی ئەمنییە

ئاڤا نیوز

شەوی ڕابردوو چەند کەسێک تەقەیان بە ئاراستەی ناوچەی پارتی لە خورماتوو کردووە، هێزە ئەمنییەکانی عێراق سێ کەسیان دەستگیر کردووە. بەرپرسی ناوچەی پارتی دەڵێ، "یەکێک لەوانەی دەستگیر کراوە، کارمەندی هێزە ئەمنییەکانە و سەر بە حزبێکی کوردستانییە".

چیرۆکی سەرەکی: درەنگانی شەوی ڕابردوو، چەند کەسێک لە شەقامی نزیک بارەگای ناوچەی پارتی لە خورماتوو تەقەیان کرد. دواتر هەواڵگری عێراق سێ کەسیان دەستگیر کرد.

لێدوانی فەرمی: ئیسماعیل دەلۆ، بەرپرسی ناوچەی دوز بۆ ئاڤا قسەیکردووە دەڵێت: ئێمە دڵنیانین کە تەقەکان بە ئامانجی بارەگای پارتی بووبێ، تەنیا هێندە نەبێ ئەو کەسانە پێچەوانەی ئاراستەی شەقامەکە دەهاتن. تەقەیەکی زۆری هەڕەمەکییان کرد. 

"هەموو ئەوانەی تەقەیان کرد ناسراون، تەنانەت یەکێک لە تەقەکەرەکان کارمەندی هێزێکی ئەمنییە و سەر بە حزبێکی کوردییە و لە ناحیەی زینانە دەوام دەکات" ئیسماعیل دەلۆ ئەمەی وت.