زاگرۆس فەتاح پیرۆزبایی ساڵیادی دامەزراندنی ئاڤا میدیا دەکات

ئاڤا نیوز 

زاگرۆس فەتاح، ئەندامی مەکتەبی سیاسیی پارتی دیموکراتی کوردستان پیرۆزبایی ساڵیادی دامەزراندنی ئاڤا میدیا دەکات و دەڵێت: ئەم سەرکەوتنە خێرا و گەورەیە لە ماوەی ساڵێکدا نیشانەی پڕۆفیشناڵییەت لە ڕاگەیاندن و ڕاستگۆیی لە هەواڵ و خێرایی لە گەیاندندایە. 

 

دەقی پەیامەکەی زاگرۆس فەتاح، ئەندامی مەکتەبی سیاسیی پارتی دیموکراتی کوردستان:

بۆ بەرپرس و بەڕێوەبەر و پێشکەشکار و سەرجەم کارمەندانی کەناڵی ئاسمانی ( ئاڤا میدیا) 

سڵاو و ڕێز.. 

بەبۆنەی یەکەم ساڵوەگەری دەستپێکی پەخشی کەناڵە خۆشەویستەکەتان کەناڵی ئاڤا میدیا، پیرۆزباییەکی گەرمتان لێ دەکەین. دڵخۆشین کە کەناڵەکەتان لە ماوەی کورتی یەکساڵەی کارکردنیدا توانیویەتی وەک سەرچاوەیەکی خێرا و باوەڕپێکراوی هەواڵ و زانیاری، خۆی بە بینەرانی کوردستان و عێراق بناسێنێت و جێی خۆی لە دڵی بینەرانیدا بکاتەوە. 

 

بێگومان ئەم سەرکەوتنە خێرا و گەورەیە لە ماوەی ساڵێکدا نیشانەی پڕۆفیشناڵییەت لە ڕاگەیاندن و ڕاستگۆیی لە هەواڵ و خێرایی لە گەیاندندایە، کە ئەمانە بەگشتی لە پێوەرە بنەڕەتییەکانی کاری ڕاگەیاندن و پێشکەوتن و بەرەوپێشچوون لە ئەدا و شێوازی نوێی کارکردن لە کوردستان بەگشتی و لای بینەرانی کەناڵەکەتان بەتایبەتین. 

 

بەخۆشحاڵییەوە کەناڵەکەتان شەوانە میوانێکی ئازیز و خنجیلانەی لە دڵاشیرینی هەموو ماڵێکی کوردە لە سەرانسەری جیهاندا، ئەمەش نیشانەی سەرکەوتوویی و خۆشەویستی کەناڵەکەتانە لەنێو جەماوەری کوردستان و بینەراندا، بەتایبەتی لە بڵاوکردنەوە و گەیاندنی گیروگرفتەکانی خەڵک بە دەسەڵات و خێرا بەدەنگەوەهاتنی بەرپرسانی حکومی بۆ پەرۆشی و بەدەنگەوەهاتن و چارەسەرکردنی کەموکوڕییەکانی ناو کۆمەڵگە، کە هەر ئەم خاڵەش یەکێک لە بەهێزترین هۆکارەکانی پشتیوانی خەڵک لە کەناڵە خۆشەویستەکەتانە.

 

زاگرۆس فەتاح

ئەندامی مەکتەبی سیاسیی پارتی دیموکراتی کوردستان