ئاڤای خەڵک؛ كەسوكاری پلە یەكی شەهیدان لە سلێمانی داوای خەرجکردنی پارەی خوێندن دەکەن

ئاڤا نیوز

 

کەسوکاری پلە یەکی شەهیدان لە شاری سلێمانی گلەیی و ناڕەزایی خۆیان دەردەبڕن لە دواکەوتنی خەرجکردنی پارەی خوێندنی منداڵەکانیان لە زانکۆ و پەیمانگا تایبەتەکان، کە بە بڕیاری ئەنجوومەنی وەزیران دەبوو حکومەت بیدات.

 

چیرۆکی سەرەکی: بەپێی وتەی کەسوکاری پلە یەکی شەهیدان، لە ساڵی 2019ـەوە ئەم پارەیە بۆیان خەرج نەکراوە. سیروان موحسین، کە برای شەهیدە و برازاکەی (کوڕی شەهید) لە پەیمانگایەکی ئەهلی سلێمانی خوێندویەتی، بە پەیامنێری ئاڤا،  ژیوار عەبدولرەحمانی ڕاگەیاندووە: "من خۆم پارەی ساڵەکانی خوێندنی برازاکەم داوە و وتم دواتر خۆم وەری دەگرمەوە، بەڵام تەنیا کرێی ساڵی یەکەمی خوێندنمان وەرگرتووەتەوە و پارەی چوار ساڵەکەی دیکەمان تاوەکوو ئێستا وەرنەگرتووەتەوە."

 

لێدوانی فەرمی: مەحموود سەرمۆردی، بەڕێوەبەری ڕاگەیاندن و پەیوەندییەکانی بەڕێوەبەرایەتیی گشتیی شەهیدان و ئەنفالکراوانی سلێمانی، هۆکاری دواکەوتنەکەی خستەڕوو و بە ئاڤای ڕاگەیاند،: "بەهۆی دۆخی دارایی کوردستان و نەبوونی پارەوە، شەش ساڵە پارەی قوتابیانی کەسوکاری شەهید خەرج نەکراوە." 

 

گوتیشی "نووسراوی فەرمی بۆ ئەنجوومەنی وەزیران کراوە، بەڵام بەهۆی نەبوونی پارەوە خەرجکردنەکە وەستاوە." بەڕێوەبەری ڕاگەیاندن و پەیوەندییەکانی بەڕێوەبەرایەتیی گشتیی شەهیدان و ئەنفالکراوانی سلێمانی دڵنیاییشی دایە کەس و کاری شەهیدان و گوتی: "ئەمە ئەوە ناگەیەنێت کە پارەی ئەو قوتابیانە و زانکۆ و پەیمانگاکان دەفەوتێت. بە دڵنیاییەوە لە هەوڵەکانمان بەردەوام دەبین تاوەکوو گرفتەکە چارەسەر دەبێت و پارەکانیان دەدرێت."

 

ئەوەی پێویستە بیزانیت: بەپێی زانیارییەکان، هەندێک لە زانکۆ و پەیمانگاکان خۆیان پارەیان لە کەسوکاری شەهیدان وەرنەگرتووە و پێیان گوتوون کە خۆیان لەگەڵ وەزارەتی شەهیدان قسە دەکەن و وەری دەگرنەوە، بەڵام ئەوانیش تا ئێستا پارەکەیان وەرنەگرتووەتەوە.