نوجەبا لەبارەی سزاکەی ئەمریکا: بەهای نییە و لەکاری خۆمان بەردەوام دەبین

ئاڤا نیوز

گرووپی نوجەبا کە دوێنێ ئەمریکا لەگەڵ سێ گرووپی دیکەی عێراقیدا خستنیە لیستی "ڕێکخراوە تیرۆریستییەکانەوە"، دەڵێت، بڕیارەکەی ئەمریکا هیچ بەهایەکی نییە و  کاریگەریشی لەسەر ئاڕاستەی کارکردنیان نابێت.

چیرۆکی سەرەکی: دوێنێ ئەمریکا چوار گرووپی چەکداری عێراقیی نزیک لە ئێرانی وەک "ڕێکخراوی تیرۆریستیی بیانی" دەستنیشان کرد کە ئەوانیش بریتیی بوون لە بزووتنەوەی نوجەبا، کەتائیبی سەیید شوهەدا، بزووتنەوەی ئەنساروڵڵا ئەوفیا و کەتائیبی ئیمام عەلی،  ئەمەش وەک هەنگاوێک بۆ کەمکردنەوەی کاریگەریی ئێران لە ناوچەکە و پاراستنی بەرژەوەندییەکانی ئەمریکا لە عێراق.

لێدوانی فەرمی: عەبدولقادر کەربەلائی، یاریدەدەری سەربازیی ئەمینداری گرووپی نوجەبا لە هەژماری خۆی لە تۆڕی ئێکس ڕایگەیاند، ئەمریکا بیانخاتە هەر لیست و ناوێکەوە ئەوان لەسەر ڕێگەی "ڕاست، دادپەروەر، شانازی و شکۆ" بەردەوام دەبن و قودسیش وەک ڕەمزی خەباتیان دەمێنێتەوە.

زانیاریی زیاتر: بەگوتەی کەربەلائی، بڕیارەکەی ئەمریکا کە گرووپی نوجەبای خستووەتە لیستی تیرۆر "شوێنی لەژێر پێیان دایە و هیچ نییە لەبەرامبەر ئیرادەی خۆڕاگرییان".