عێراق ماڵئاوایی لە مامەڵە کاغەزییەکان دەکات و دەچێتە سەردەمی واژۆی ئەلیکترۆنییەوە

ئاڤا نیوز

وەک هەنگاوێک بەرەو گۆڕانکاری دیجیتاڵی و کۆتاییهێنان بە ڕۆتینی کارگێڕی و ئیداری، حکومەتی عێراق بە فەرمی کارکردنی بە واژۆی ئەلیکترۆنی ڕاگەیاند.

چیرۆکی سەرەکی: ڕۆژی پینجشەممە 18-9-2025 محەمەد شیاع سوودانی، سەرۆکوەزیرانی عێراق، بەفەرمی ڕەزامەندی لەسەر دەستپێکردنی پڕۆژەی واژۆی ئەلیکترۆنیدا، کە بەپێی یاسای مامەڵە ئەلیکترۆنییەکان ژمارە (78) ساڵی 2012 و ڕێنماییەکانی ساڵی 2025 جێبەجێ دەکرێت. 

لێدوانی فەرمی: بەپێی بڵاوکراوەیەکی نووسینگەی ڕاگەیاندنی سەرۆکوەزیران: سوودانی ڕایگەیاند:

- ئەم هەنگاوە بەشێکە لەکارنامەی حکومەت سەبارەت بە گۆڕانکاری دیجیتاڵی پیشکەشکردنی ئاسانکاری بۆ ڕایکردنی مامەڵەی هاووڵاتیان و کەمکردنەوەی گەندەڵی کارگێڕی و دارایی و ڕۆتین کە بەهۆی مامەڵە کاغەزییەکانەوە دووچاری هاووڵاتیان دەبێتەوە.

 - ئەم ڕێکارە هەموو مامەڵەکانی دەوڵەت و کەرتی تایبەت و هاووڵاتیان دەگرێتەوە و لەسەر ئاستی جیهانیی بە فەرمی پەیڕەو دەکرێت، هاوکات متمانەی هاووڵاتیان بە ڕێکارەکانی دەوڵەت و دامەزراوەکانی زیاتر دەکات.

 
- چاوەڕوان دەکرێت ئەم گۆڕانکارییە کاریگەرییەکی بەرچاوی لەسەر خێراکردنی خزمەتگوزارییەکان هەبێت و سیستمێکی کارگێڕی مۆدێرنتر و شەفافتر لە عێراقدا بێنێتە کایەوە.