بۆ ڕێگرکردن لە گەڕاندنەوەی سزاکان، ئێران پێشنیازێکی نوێ دەداتە ئەوروپا

ئاڤا نیوز

ئەنجوومەنی ئاسایشی نێودەوڵەتیی تاوتوێی گەڕانەوەی سزاکان بۆ سەر ئێران دەکات.

لێدوانی فەرمی: عەباس عێراقچی، وەزیری دەرەوەی ئێران، ڕایگەیاند پێشنیازێكی "داهێنەرانە، دادپەروەرانە و هاوسەنگ"ـیان سەبارەت بە بەرنامەی ئەتۆمی داوەتە وڵاتانی ئەوروپا تا بە هۆیەوە ڕێگری لە گەڕاندنەوەی سزا نێوەدەوڵەتییەکان بۆ سەر ئەو وڵاتە بکەن.

زانیاریی زیاتر: بەریتانیا، فەرەنسا و ئەڵمانیا داوایان کردبوو ئەنجوومەنی ئاسایشی نەتەوەیەکگرتووەکان سزا نێودەوڵەتییەکانی پەیوەست بە بەرنامە ئەتۆمییەکەی ئێران کارا بکاتەوە. بڕیارە ڕۆژی هەینی، 19-9-2025 ئەنجوومەنی ئاسایش سەبارەت بەم پرسە کۆ ببێتەوە. 

ئەمەش بزانە: ئەوروپا نیگەرانە لەوەی ئێران هاوکاریی لەگەڵ ئاژانسی نێودەوڵەتیی وزەی ئەتۆم ناکات و چارەنووسی وێستگە ئەتۆمییەکانی دوای هێرشەکانی ئەمریکا بۆ سەریان ئاشکرا ناکات.