چەند وڵاتێکی ئەوروپی عێراق لە لیستی وڵاتانی "مەترسیدار بۆ گەشتکردن" دەردێنن

ئاڤا نیوز

ڕۆژی هەینی، وەزارەتی دەرەوەی عێراق پێشوازیی لە بڕیاری نوێی فەرەنسا، هۆڵەندا و بەریتانیا سەبارەت بە دەرکردنی ڕێنمایی نوێی گەشتکردن بۆ عێراق دەرکرد، کە عێراقیان لە لیستی وڵاتانە مەترسیدارەکان دەرکردووە.

چیرۆکی سەرەکی: فەرەنسا، بەریتانیا و هۆڵەندا گۆڕانکارییان لە ڕێنماییەکانی گەشتکردنیان بۆ عێراق لە ڕەنگی سوور واتە مەترسیدار بۆ پرتەقاڵی واتە کەمبوونەوەی مەترسی ڕاگەیاند، ئەمەش دەبێتە هۆی ئاسانکاری بۆ هاتنی کۆمپانیاکانی وەبەرهێنان و گەشتیاران و ڕێگە خۆشکردن بۆ بەرزکردنەوەی هاوکارییە ئابووری و کولتوورییەکان.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا پێشوازیی لەو گۆڕانکارییە ئەرێنییانە دەکات کە لە چەند هەفتەی ڕابردوودا لەلایەن ژمارەیەک وڵاتی ئەوروپییەوە لە ڕێنمایی گەشتیاریدا دەرچوون، وەزارەتەکە جەخت دەکاتەوە کە ئەوەش ئەنجامی ئەو هەوڵە دیپلۆماسیانەی وەزارەتی دەرەوە و باڵیۆزخانەکانیایەتی لە وڵاتان.

باکگراوند: بەهۆی پابەندنەبوون بە مەرجەکانی سەلامەتی و پێوەرەکانی فڕۆکەوانی مەدەنی و خراپی ژێرخانی فڕۆکەخانەکان، یەکێتیی ئەوروپا یازدە ساڵە سەرجەم گەشتەکانی هێڵی ئاسمانی عێراقی بۆ وڵاتانی ئەوروپا قەدەغە کردووە.