هۆشدارییەک لە وەزارەتی کارەباوە: بەرهەمهێنانی كارەبا 1600 مێگاوات كەم دەبێتەوە

ئاڤا نیوز

 

بەهۆی ڕێكارێكی كۆمپانیایەکی بەرهەمهێنانی گاز لە هەرێمی كوردستان، توانای بەرهەمهێنانی وێستگەكانی كارەبا بە بڕی هەزار و 600 مێگاوات كەم دەبێتەوە، هەردوو وەزارەتی كارەبا و سامانە سرووشتییەكان لەسەر هێڵن تاوەکو كاریگەرییەكەی لەسەر هاوبەشانی كارەبا كەم بكەنەوە.

 

چیرۆكی سەرەكی: كۆمپانیای دانەگاز لە ڕۆژانی 20، 21 و 22ـی ئەم مانگە، چاكسازیی ساڵانەی خۆی لە پرۆسەی بەرهەمهێنانی گاز دەست پێ دەكات كە بەهۆیەوە بڕی 300 ملیۆن پێ سێجا، بەرهەمهێنانی گاز كەم دەبێتەوە.

 

ڕاگەیێنراوی فەرمی: وەزارەتی كارەبای حكومەتی هەرێمی كوردستان، لەبارەی ئەو ڕێكارەی كۆمپانیای دانەگاز بۆ بەرهەمهێنانی گاز، ئاگادارینامەیەك بڵاو دەكاتەوە و ڕایدەگەیەنێت، بەهۆی كەمبوونەوەی ئاستی بەرهەمهێنانی گاز بە بڕی 300 ملیۆن پێ سێجا، توانای بەرهەمهێنانی وێستگەكانی كارەبا بە زیاتر لە 1600 مێگاوات كەم دەبێتەوە.

 

ئەوەی پێویستە بیزانیت: هەردوو وەزارەتی کارەبا و وەزارەتی سامانە سرووشتییەکانی حكومەتی هەرێمی كوردستان لەسەر هێڵ دەبن بۆ کۆنترۆڵ کردن و کەم کردنەوەی کاریگەرییەکانی لەسەر هاوبەشانی کارەبا.