شاخەوانانی کورد سەرکەوتنێکی مێژوویی لەسەر لووتکەی زنجیرە چیاکانی قەفقاز تۆمار دەکەن

ئاڤا نیوز

 

دوو شاخەوانی کورد لە یانەی شاخەوانیی قەندیلی پیرانشار، توانییان سەرکەوتنێکی گرنگ و مێژوویی لەسەر لووتکەی چیای شخارا بەدەست بهێنن. ئەم چیایە بە یەکێک لە بەرزترین و تەکنیکیترین لووتکەکانی زنجیرە چیای قەفقاز لە گورجستان دادەنرێت.

بۆچی گرنگە؛ محەممەد ئەمین محەممەدی و محەممەد زاهیر، لە ڕۆژی 2025/9/17 بە سەرکەوتوویی گەیشتنە لووتکەی شخارا کە بەرزییەکەی 5 هەزار و 210 مەترە. ئەم سەرکەوتنە جیاواز و تایبەتە، چونکە لەم ساڵدا، دوو گرووپی شاخەوانی دیکە (یەکێکیان سویسی و ئەوی دیکەیان گورجستانی) لە هەوڵەکانیاندا بۆ سەرکەوتن بەسەر ئەم چیایەدا سەرکەوتوو نەبوون.

ئێستا چی ڕوودەدات؛ ئێستا گرووپی شاخەوانانی کورد لە یەکێک لە گوندەکانی خوارەوەی چیاکە لە قەفقاز خەریکی پشوودان و خۆئامادەکردنن بۆ هەوڵێکی دیکە بۆ سەرکەوتن بەسەر لووتکەی ئوشبادا.

ئەوەی پێویستە بیزانیت: محەممەد ئەمین محەممەدی تەمەن 37 ساڵ، خەڵکی شاری پیرانشار و بەرپرسی گرووپی شاخەوانی قەندیلە. دوو ساڵ لەمەوبەریش بەسەر لووتکەی شاخی ماناسڵۆ لە وڵاتی نیپاڵدا سەرکەوت، کە بەرزییەکەی 8 هەزار و 136 مەترە. محەممەد ئەمین محەممەدی وەک یەکێک لە شاخەوانە ناودار و شارەزاکانی ڕۆژهەڵاتی کوردستان و ئێران دادەنرێت، هەروەها وانەبێژی شاخەوانی و ڕاهێنەریشە.