زەکەریا عەبدوڵڵا: تەندروستیم باشە و هیچ کێشەیەکم نییە

ئاڤا نیوز

زەکەریا عەبدوڵڵا، هونەرمەندی ناوداری کورد ڕوونکردنەوە لەبارەی دۆخی تەندروستی خۆی دەدات و دەڵێت تەندروستی زۆر باشە و هیچ کێشەیەکی نییە.

چیرۆکی سەرەکی: چەند ڕۆژێکە دەنگۆی تووشبوونی زەکەریا عەبدوڵڵا بە شێرپەنجە بڵاوبووەتەوە، ئەمڕۆ ئومێد خۆشناو، پارێزگاری هەولێر تەلەفۆنی بۆ کردووە و لە هەواڵی پرسیوە.

زەکەریا دەنگۆکەی ڕەت کردووەتەوە و پێی گوتووە: لە خودا بەزیاد بێت تەندروستی زۆرباشە و هەواڵی نەخۆشکەوتنی دوورە لە ڕاستییەوە.

ئومێد خۆشناو وێنەیەکی خۆی و زەکەریا عەبدوڵڵای بڵاو کردووەتەوە، لە شوێنێک دانیشتوون و  جلی نافەرمییان پۆشیوە.

لێدوانی فەرمی: ئومێد خۆشناو، پارێزگاری هەولێر بە ئاڤای گوت، ئێستا  زەکەریا لە دەرەوەی کوردستانە و سەرقاڵی پڕۆژەکانی خۆیەتی، ئەم وێنەیەشیان چەند ڕۆژێک لەمەوبەر لە شاری هەولێر لە یەکێک لە کافتریاکان گرتووە.

لەلایەکی دیکەوە: هونەرمەند زەکەریا عەبدوڵڵا سوپاسی پارێزگاری هەولێری کرد بۆ گرنگیپێدان و پەیوەندییە تەلەفۆنییەکەی. وێڕای ڕەتکردنەوەی تەواوی ئەو دەنگۆیانە، ئاماژەی بەوەدا کە تەندروستی زۆرباشە و هەواڵی نەخۆشکەوتنەکەی دوورە لە ڕاستییەوە.

باکگراوند: زەکەریا عەبدوڵڵا هونەرمەندێکی دیاری کوردە، دەنگێکی تایبەتی هەیە و هاوادارێکی زۆری هەیە، یەکەم ئەلبوومی لە ساڵی 1998 بە ناوی (تۆ هاتی) بڵاو کردەوە، حەوت ئەلبوومی گۆرانی هەیە، دوایین ئەلبوومی بە ناوی لاپەڕەی سپی لە ساڵی 2010 بڵاو کردەوە و لەوکاتەوە وازی لە گۆرانی وتن هێناوە.