ئاڤا نیوز کاتە پێشنیازکراوەکان بۆ دواخستنی هەڵبژاردن ئاشکرا دەکات

ئاڤا نیوز

بەرپرسی بەشی هەڵبژاردنی پارتی لە مەکتەبی ڕێکخستنی دهۆک ڕایگەیاند، دوو پێشنیاز بۆ دواخستنی هەڵبژاردن کراوە و هیچیان لەسەر داوای پارتی نەبووە.

 

لێدوانی فەرمی: خالید ئەحمەد، بەرپرسی بەشی هەڵبژاردنی پارتی لە مەکتەبی ڕێکخستنی دهۆک بە ئاڤا نیوزی گوت، دوو پێشنیاز بۆ دواخستنی هەڵبژاردنەکانی پەرلەمانی کوردستان هەن، کە یەکێکیان بۆ چوار مانگ دوا بخرێت و لە مانگی ئۆکتۆبەر بکرێت، دووەمیشیان ئەوەیە ساڵی داهاتوو لەگەڵ هەڵبژاردنەکانی ئەنجوومەنی نوێنەرانی عێراق بکرێن.

 

قووڵتر: "لەو دوو پێشنیازە هیچیان لەسەر داوای پارتی دیموکراتی کوردستان نییە و داوای ئێمە چارەسەرکردنی کێشەی یاسایی و تەکنیکی و کۆتاییهێنانە بە فشارە سیاسی و ئابوورییەکان لەسەر خەڵک و ئۆرگانە یاسایی و دەستوورییەکانی هەرێمی کوردستان". بەرپرسی بەشی هەڵبژاردنی پارتی لە مەکتەبی ڕێکخستنی دهۆک وا دەڵێت.

 

ئەوەی پێوسیتە بیزانیت: کۆمیسیۆنی باڵای سەربەخۆی هەڵبژاردنەکانی عێراق دەرگای پێشکەشکردنی لیستی بەربژێر و حیزب و هاوپەیمانییەکانی داخستووە و لە ئامادەکارییەکانی بۆ بەڕێوەچوونی هەڵبژاردنەکان بەردەوامە.

 

لەلایەکی دیکەوە: مەحموود محەممەد، گوتەبێژی پارتی ڕایگەیاند، دواخستنی هەڵبژاردن وەک بژاردەیەک لەگەڵ پارتی باس کراوە بۆ ئەوەی پارتی بەشداریی هەڵبژاردن بکات و لێرەوە دووپاتی دەکەینەوە کە پارتی هەمیشە لەگەڵ هەڵبژاردنێکی دەستووری و شەفاف و بێگەردە و ئەگەر هەڵبژاردن بۆ کاتێکی دیکەش دوابخرێت دەبێت ئەو ڕاستکردنەوە دەستووری و یاسایی و تەکنیکیانە بکرێن کە بۆ بەڕێوەچوونی هەڵبژاردنێکی پاک و بێگەرد پێویستە.

 

وێنە گەورەكە: بڕیارە ڕۆژی 10ـی حوزەیرانی ئەمساڵ هەڵبژاردنەکانی پەرلەمانی کوردستان بەڕێوەبچێت، بەڵام پارتی بە ‌‌هەڵبژاردنێکی سەپێنراو و دەستوەردانی دەرەکی ناوی دەبات، بۆیە لیستی بەربژێرەکانی خۆی پێشکەش بە کۆمیسیۆنی نەکردووە.