عێراق بۆ چارەسەری کێشەی کارەبا هەوڵی بەدەستهێنانی غازی کەنداو دەدات

ئاڤا نیوز

وەزارەتی نەوتی عێراق تاوتوێی هاوردەکردنی غاز لە وڵاتانی کەنداو دەکات، وەک هەنگاوێک بە ئامانجی هەمەچەشنکردنی سەرچاوەکانی وزە.

وێنە گەورەکە: بەهۆی گوشارەکانی ئەمریکاوە، هەوڵی عێراق بۆ چارەسەرکردنی قەیرانی کارەبای درێژخایەن بە بەکارهێنانی غازی تورکمانستان لەڕێگەی ئێرانەوە شکستی هێنا، ئەمەش وای کردووە بەغدا بەدوای بژاردەی دیکەدا بگەڕێت. 

لێدوانی فەرمی: هەیسەم ئیبراهیم موحسین، بەڕێوەبەری گشتیی کۆمپانیای پاڵاوگەکانی ناوەڕاست، لە لێدوانێکدا بە ڕۆژنامەی "سەباح"ی ڕایگەیاند، ئاراستەی وەزارەت بۆ کردنەوەی دەروازەی نوێ بۆ هاوردەکردنی غاز، لە چوارچێوەی پلانە ستراتیژییەکان دێت بۆ ڕووبەڕووبوونەوەی خواستە گەشەسەندووەکانی لەسەر غاز، ئەمەش توانای خۆگونجاندنی زیاتر بە وڵات دەبەخشێت لە دابینکردنی بڕی پێویست بۆ هەموو کەرتەکان و بە پلەی یەکەمیش کارەبا.

بۆچی گرنگە؟: ئەم هەنگاوە یارمەتیدەر دەبێت بۆ دابینکردنی بڕێکی زیاتری غاز بۆ وێستگەکانی کارەبا، بەتایبەت لەگەڵ زیادبوونی خواست لەسەر کارەبا. هاوکات عێراق بەمە سەرچاوەکانی دابینکردنی وزە هەمەچەشن دەکات و کەمتر پشت بە یەک سەرچاوە دەبەستێت.

ئەوەی پێویستە بیزانیت: سەرەڕای ئەو بودجە زەبەلاحەی لە ماوەی 22 ساڵی ڕابردوودا بۆ کەرتی کارەبا لە عێراق تەرخانکراوە، بەڵام تاوەکو ئێستا نەتوانراوە نیوەی ئەو بڕە کارەبایە بەرهەم بهێنرێت کە وڵاتەکە پێویستیەتی.