هەوڵەکانی عێراق بۆ هاوردەکردنی گازی تورکمانستان شکست دەهێنێت

ئاڤا نیوز

بەپێی ئاژانسی هەواڵی نێودەوڵەتیی ڕۆیتەرز، هەوڵەکانی عێراق بۆ ڕازیکردنی ئەمریکا سەبارەت بە هاوردەکردنی گازی تورکمانستان لەڕێگەی ئێرانەوە سەرکەوتوو نەبووە.

چیرۆکی سەرەکی: بەپێی ڕێککەوتنێکی سێ قۆڵی نێوان عێراق، تورکمانستان و ئێران، بڕیاربوو تورکمانستان گاز بە عێراق بگەیەنێت لەڕێی ئێرانەوە کە دەکەوێتە نێوان هەردوو وڵاتەکە، بەگوێرەی ڕێککەوتنەکەش، ئێران گازەکە وەردەگرێت و دەیگەیەنێتە عێراق، لەبەرامبەردا نزیکەی چارەکێک لەو بڕە گازە بۆ خۆی  گلدەداتەوە،  بەڵام ئەم ڕێککەوتنە پێویستی بە ڕەزامەندی ئەمریکا بوو.

ڕاگەیێنراوی فەرمی: ئاژانسی هەواڵی نێودەوڵەتیی ڕۆیتەرز، ڕایگەیاند: بەهۆی گوشارەکانی ئەمریکاوە، هەوڵی عێراق بۆ چارەسەرکردنی قەیرانی کارەبای درێژخایەن بە بەکارهێنانی گازی تورکمانستان لەڕێگەی ئێرانەوە، شکستی هێنا، ئەمەش وای کردووە بەغدا بەدوای بژاردەی دیکەدا بگەڕێت.

زانیاریی زیاتر: ڕۆیتەرز لە زاری چوار بەرپرسی عێراقیی و حەوت بەڵگەنامەی فەرمییەوە  بڵاوی کردووەتەوە،  بەغدا بۆ ماوەی چەند مانگێک هەوڵی داوە ڕەزامەندی واشنتن بەدەست بهێنێت تا ڕێگەی پێ بدرێت ساڵانە نزیکەی پێنج ملیار مەتر سێجا گازی تورکمانستان بە هاوکاری کۆمپانیای نیشتمانیی گازی ئێران هاوردە بکات.

ڕێککەوتنەکە به‌م شێوه‌یه‌یه‌: یەکێک لە بەڵگەنامەکانی ڕۆیتەرز، دەریخستووە کە ئێران هیچ بڕە پارەیەک وەک ترانزێت وەرناگرێت، بەڵام بۆ پڕکردنەوەی پێداویستییەکانی خۆی، ڕۆژانە نزیکەی 23%ـی کۆی گازەکە گلدەداتەوە، بەغداش پێشنیازی کردووە ڕێگە بە چاودێرێکی سێیەمی نێودەوڵەتیی بدرێت سەرپەرشتی جێبەجێکردنی گرێبەستەکە بکات تا لەگەڵ گەمارۆکانی ئەمریکا و یاساکانی بەرەنگاربوونەوەی سپیکردنەوەی پارەدا، بگونجێت.

ئەمەش بزانە: بەپێی ڕاپۆرتەکەی ڕۆیتەرز، وەزارەتی خەزێنەی ئەمریکا ڕەتیکردەوەتەوە هیچ زانیاریەک سەبارەت بەم بابەتە بدات، بەڵام سەرچاوەیەکی ئەمریکی ئاگادار لە بابەتەکە ڕایگەیاندووە کە ئیدارەی ترەمپ ڕەزامەندی نادات لەسەر هیچ ڕێککەوتنێک سوود بە ئێران بگەیەنێت.