ئاڤای خەڵک؛ لە زانکۆی پزیشکیی هەولێر قوتابیانی بەشی مایکڕۆربایۆلۆجی داوای چارەسەری کێشەکەیان دەکەن

ئاڤا نیوز

 

قوتابیانی بەشی مایکرۆبایۆلۆجی پزیشکی لە زانکۆی پزیشکیی هەولێر، بەهۆی نەناساندنی بڕوانامەکانیان لە بەغدا، تووشی دڵەڕاوکێیەکی زۆر بوونەتەوە. کێشەکە لەوەدایە کە حکومەتی عێراقی تەنیا لە حاڵەتێکدا ئامادەیە بڕوانامەکانیان بناسێنێت کە پاشناوی "پزیشکی" (Medical) لە بڕوانامەکانیان لاببرێت، ئەمەش پرسیاری گەورە لەسەر داهاتووی پیشەیی و دامەزراندنیان دروست دەکات.

 

چیرۆکی سەرەکی: قوتابییانی بەشی مایکرۆبایۆلۆجی پزیشکی لە زانکۆی هەولێر دەڵێن، حکومەتی عێراقی داوای لێکردوون کە واز لە پاشناوی "پزیشکی" لە بڕوانامەکانیان بهێنن، بۆ ئەوەی بڕوانامەکانیان وەک مایکرۆبایۆلۆجی تەندروستی بناسێنرێن و بتوانن دابمەزرێن. ئەمەش لە کاتێکدایە کە زانکۆی کۆیە هەمان بەشی هەیە و بڕوانامەکانیان بە بێ کێشە ناسێندراون.

 

- قوتابییەکان باس لەوە دەکەن کە چەندین جار داوایان لە ڕاگر و بەرپرسی بەشەکە کردووە بۆ چارەسەرکردنی ئەم کێشەیە، بەڵام تا ئێستا هیچ ئەنجامێکی نەبووە و دڵەڕاوکێیەکی زۆر باڵی بەسەردا کێشاون. ئەوان پێیان وایە کە لابردنی پاشناوی "پزیشکی" کاریگەری نەرێنی لەسەر داهاتووی پیشەیی و دەرفەتی دامەزراندنیان دەبێت، بە تایبەت لە کەرتی تەندروستیدا.

 

لێدوانی فەرمی: لە لایەکی دیکەوە، دکتۆرە حەمدیە میرخان، ڕاگری کۆلێژی پزیشکی، لە لێدوانێکیدا بۆ ئاڤا ئاماژەی بەوەدا، قوتابییەکان "بێ هیچ هۆکارێک" ئەم بابەتەیان گەورە کردووە. ئەو ڕوونی کردەوە کە کێشەکە ئەوەیە حکومەتی عێراقی داوای کردووە پاشناوی "میدیکاڵ" لە ناوی بەشەکە لاببرێت بۆ ئەوەی دان بە بڕوانامەکان بنرێت.

 

دکتۆرە حەمدیە دڵنیایی دایە قوتابیان کە ئەوان لەسەر هێڵن لەگەڵ وەزارەتی خوێندنی باڵا و حکومەتی عێراقی بۆ چارەسەرکردنی کێشەکە. ئەو جەختی لەوە کردەوە کە ئەو قوتابییانەی ئێستا لە کۆلێژەکە دەخوێنن، لە هەر قۆناغێک بن، بڕوانامەکانیان هەر پاشناوی "پزیشکی"یان لەسەر دەبێت. بەڵام بۆ ساڵی خوێندنی (2025-2026)، پاشناوەکە بۆ ماوەیەکی کاتی لادەدرێت.

 

ئەوەی پێویستە بیزانیت: هەروەها ڕاگری کۆلێژ ئەوەشی خستەڕوو کە ئەم بابەتە "بە هیچ جۆرێک کاریگەری لەسەر بڕوانامەی قوتابیان نابێت و نەبووە."