دەزگای ئاسایشی نیشتمانيی عێراق بكوژی ئەكبەر حاجی ڕۆستەم ڕادەستی ئاسایشی سلێمانی دەكات

ئاڤا نیوز

بەڕێوەبەرایەتیی گشتیی ئاسایشی سلێمانی ئاشكرای دەكات كە دەزگای ئاسایشی نیشتمانیی عێراق بكوژی ئەكبەر حاجی ڕۆستەمی ڕادەستی ئاسایشی سلێمانی كردووە و دانی ناوە بە تاوانەكەدا ناوە.

چیرۆکی سەرەکی:  ئێوارەی ڕۆژی  22ـی 9ـی 2025، ئەکبەر حاجی ڕۆستەم، یەکێک لە کەسایەتییە دیارەکانی سنووری گەرمیان لەنێو باخەکەیدا لە گوندی ئۆمەربلی سنووری شارۆچكەی کفری کوژرا، هەر ئەوكات بڵاو كرایەوە كە بكوژەكە ئۆتۆمبێل و مۆبایل و چەند كەلوپەلێكی دیكەی كوژراوی لەگەڵ خۆیدا بردووە و بەرەو شوێنێكی نادیار هەڵاتووە، دواتر دەركەوت كە گەنجێكی بە نەتەوە عەرەبە و ڕۆژی دواتر لەلایەن هێزە ئەمنییەكانەوە لە بەغدا دەستگیر كرا.

ڕاگەیێنراوی فەرمی: بەڕێوەبەرایەتیی گشتیی ئاسایشی سلێمانی ئەمڕۆ هەینی 26-9-2025 بڵاوی كردەوە: دەزگای ئاسایشی هەرێم بەهەماهەنگی دەزگای ئاسایشی نیشتمانی عێراق تۆمەتباری کوشتنی ( ئەکبەری حاجی رۆستەم )ی لەشاری بەغدا دەستگیر کرد، لەگەڵ ئەوەش دا ڤیدیۆی دانپێدانانی بكوژەكەی بڵاو كردووەتەوە.

زانیاریی زیاتر: بەپێی ڕاگەیێنراوەكەی ئاسایشی سلێمانی، دوای لێکۆڵینەوەکان دەرکەوتووە كە بکوژ چووەتە باخی قوربانییەکە و چاوەڕێی کردووە و دوای گەیشتنی (ئەکبەر حاجی ڕۆستەم)بە فیشەکێکی چەکی جۆری دەمانچە دەیکوژێت و دواتر بکوژ ئۆتۆمبێل و مۆبایلی کوژراو دەبات و لە شوێنی تاوان هەڵدێت و لە ڕێگەی ناحیەی سلێمان بەگ دەچێتە بەغدا و لەناوچەی دۆرە لەماڵێک خۆی حەشار دەدات. 

قووڵتر: وەك لە ڕاگەیێنراوەكەدا ئاماژەی پێدراوە، ڕۆژێك دوای ڕووداوەكە و لە ڕۆژی 23-9-2025، بكوژ لەلایەن دەزگای ئاسایشی نیشتمانی عێراق و بەهەماهەنگی و زانيارى دەزگای ئاسایشی هەرێم دەستگیر كراوە.

ئەمەش بزانە: تۆمەتبار بە نەتەوە عەرەبە و تەمەنی 22 ساڵە ناوی (عەبدول عەزیز جاسم مەحموود)ەو دەزگای ئاسایشی نیشتمانيی عێراق ڕادەستی ئاسایشی سلێمانیان كردووە و دوای لێكۆڵینەوە دانی بە تاوانەكەیدا ناوە.

ئەوەی پێویستە بیزانیت: تۆمەتبار بە بڕیاری دادوەری لێکۆڵینەوەی ئاسایش، بە ماددەی 406 لە یاسای سزادان ڕاگیڕاوە.