هاوپەیمانی سوودانی: هاوپەیمانی "بەهێزەکان" پێکدەهێنین و گەورەترین فراکسیۆنی پەرلەمانی ڕادەگەیەنین

ئاڤا نیوز

سەرکردەیەکی هاوپەیمانی ئاوەدانکردنەوە و گەشەپێدان، کە سوودانی سەرۆکایەتی دەکات دەڵێت" بە ناوی هاوپەیمانی بەهێزەکان گەورەترین فراکسیۆنی پەرلەمانی عێراق پێکدەهێنین.

وێنە گەورەکە: بۆ هەڵبژاردنی پەرلەمانی عێراق کە بڕیارە 2025-11-11 بکرێت، زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، چاوەڕێش دەکرێت ناوەڕاستی مانگی داهاتوو بانگەشەی هەڵبژاردن دەستپێبکات.

لێدوانی فەرمی: محەممەد عوگەیلی، سەرکردە لە هاوپەیمانی ئاوەدانکردنەوە و گەشەپێدان لە لێدوانێکی تەلەفزیۆنیدا رایگەیاند: هێشتا بڕوامان بە ڕێککەوتنی سیاسی لەگەڵ کورد و سوننە و پێش ئەوانیش شیعە هەیە بۆ ئیدارەدانی وڵات بەڵام پێویستە ئۆپۆزسیۆن و لایەنگر هەبن.

زانیاریی زیاتر: عوگەیلی، ئاماژەی بەوەکرد، ئەگەر هاوپەیمانی ئاوەدانکردنەوە و گەشەپێدان نەیتوانی لە خولی داهاتووی پەرلەمان ئەم بیرۆکەیە جێبەجێ بکات، ئەوا پلانی هەیە لە خولەکانی داهاتوودا جێبەجێی بکات.

ئەمەش بزانە:  هاوپەیمانی ئاوەدانکردنەوە و گەشەپێدان لە خولی ئێستای پەرلەمانی عێراق خاوەن 54 کورسی پەرلەمانییە و زۆربەشیان لە فراکسیۆنەکانی دیکەی پەرلەمانەوە پەیوەندییان بە هاوپەیمانێتییەکەوە کردووە.