کانیی بوک و زاوا لە ئاکرێ؛ بوک و زاواکان پێش هاوسەرگیری خۆیان تێیدا دەشووشت

ئاڤا نیوز

 

کانی زەرگ لە ئاکرێ، سەرچاوەیەکی ئاویی دێرینە کە مێژووەکەی بۆ سەدان ساڵ لەمەوبەر دەگەڕێتەوە، هەرچەندە نزیکەی سەدەیەکە نۆژەن کراوەتەوە و سیمایەکی نوێی بەخۆوە بینیوە. ئەم کانییە سرووشتییە هەرگیز وشکی نەکردووە و بەردەوام سەرچاوەی ئاوێکی سازگار و فێنک بووە بۆ ناوچەکە.

چیرۆکی سەرەکی: کانی زەرگ بووەتە یەکێک لە شوێنە گەشتیارییە سەرنجڕاکێشەکانی دەڤەری ئاکرێ، ڕۆژانە خەڵکێکی زۆر بە مەبەستی گەشت و سەیران ڕووی تێدەکەن. گەشتیاران دەتوانن کاتێکی خۆش لە دەوروبەری کانییەکە بەسەر ببەن، مەلە بکەن و فێنکایی ئاوەکەی هەست پێ بکەن. سرووشتی جوان و دیمەنە دڵڕفێنەکانی دەوروبەری کانییەکە، وای لێکردووە ببێتە شوێنێکی نموونەیی بۆ پشوودان و دوورکەوتنەوە لە ژاوەژاوی شار.

تایبەتمەندییەکی دیکەی کانی زەرگ بوونی ئەشکەوتێکی بچووکە لەناو ئاوەکەدا. ئەم ئەشکەوتە لە ڕابردوودا بەشێک بووە لە نەریتێکی کۆمەڵایەتی دێرین، کە بووک و زاوا تازەکان بە مەبەستی خۆشوشتن و پاکبوونەوە سەردانیان کردووە و لەناو ئەشکەوتەکەدا خۆیان شوشتووە.