کارتی زێڕینی ترەمپ: ستراتیژییەکی نوێ بۆ ڕاکێشانی سەرمایە

لە هەنگاوێکی نوێدا کە دەشێت داهاتووی سیاسەتی کۆچبەریی ئەمریکا بە تەواوی بگۆڕێت، دۆناڵد ترەمپ بڕیارێکی کارگێڕی واژۆ کرد بۆ دروستکردنی ڤیزای "کارتی زێڕین" بۆ سەرمایەدارانی بیانی و ئەو کەسانەی دەیانەوێت لە ئەمریکا نیشتەجێ ببن، هاوکات بڕیارێکی دیکەی دەرکردووە بۆ سەپاندنی باجێکی زۆر لەسەر وەرگرانی ڤیزای کارکردنی جۆری H-1B.

ئەم دوو بڕیارە جەوهەرییەی ترەمپ، دیدگایەکی ڕوونی لەسەر چۆنییەتی ڕاکێشکردنی سەرمایە و سنووردارکردنی هاتنی ئەو کەسانەی کە بە پێوەرە کۆنەکان دێنە وڵات نمایش دەکات. لەگەڵ ئەم گۆڕانکارییانەدا، سنووردارکردنی هاتنی قوتابیانی نێودەوڵەتیش دێتە ئاراوە. ئەم هەنگاوانە مشتومڕێکی گەرم لەسەر کاریگەرییە ئابووری و کۆمەڵایەتییەکانی دروست کردووە و نیگەرانییەکی زۆری لەناو کۆمپانیا گەورەکانی ئەمریکادا لێکەوتووەتەوە بە تایبەتی کۆمپانیاکانی بواری تەکنەلۆژیا، هاوکات ئەگەری ڕووبەڕووبوونەوەی یاسایی لێ چاوەڕوان دەکرێت.

پرۆگرامی "کارتی زێڕین" کە بە فەرمی بە "Trump Gold Card" ناودەبرێت و نرخەکەی یەک ملیۆن دۆلارە، ڕێگە بەو کەسانە دەدات کە لانی کەم یەک ملیۆن دۆلار بە وەزارەتی بازرگانی دەبەخشن، پرۆسەی وەرگرتنی ڤیزای کۆچبەرییان بۆ مانەوەی هەمیشەیی خێراتر بکرێت. بەڵام بۆ کۆمپانیاکان، ئەم بڕە بۆ دوو ملیۆن دۆلار بەرز دەبێتەوە بۆ  پشتگیری و سپۆنسەرکردنی کارمەندەکانیان (ئەوانەی دەیانەوێت کارمەندێکی خاوەن پسپۆڕیی تایبەت لە وڵاتێکی تر بهێنن بۆ کارێکی تایبەت لە کۆمپانیاکانیان).

بڕیار وایە کە "کارتی زێڕین" جێگەی پرۆگرامەکانی ڤیزای EB-1 و EB-2 بگرێتەوە، کە پێشتر تایبەت بوون بە کەسانی خاوەن توانای نایاب لە بوارە جیاوازەکاندا. ئەم گۆڕانکارییە، پێناسەی بەهای نایاب دەگۆڕێت و بنەمای توانای دارایی دەکات بە پێوەری سەرەکی بۆ بوون بە خاوەنی کارتی زێڕین. ئامانجی سەرەکی ئەم گۆڕانکارییانە، بە وتەی کاربەدەستانی وەزارەتی بازرگانی، دابینکردنی هەلی کاری زیاترە بۆ هاوڵاتیانی ئەمریکی، هاوکات پێشبینی دەکرێت کە ئەم پرۆگرامە سەدان ملیار دۆلار وەک داهات بۆ خەزێنەی ئەمریکا پەیدا بکات. چونکە وەرگرانی کارتی زێڕینیش وەک هەر هاوڵاتی یان نیشتەجێبوویەکی هەمیشەیی ئەمریکی باجی خۆیان دەدەن.ئەم بڕە پارەیەش پێشنیازکراوە کە بۆ کەمکردنەوەی باج و دانەوەی قەرزە فیدراڵییەکان بەکاربهێنرێت.

جگە لە کارتی زێڕین، باس لە دروستکردنی "کارتی پلاتینۆم" دەکرێت بە بڕی 5 ملیۆن دۆلار، کە ڕێگە بە مانەوەی 270 ڕۆژ لە وڵات دەدات بەبێ باج لەسەر داهاتی دەرەوەی ئەمریکا، هەرچەندە ئەمە ڕێگای هاووڵاتیبوونی پێشان نادات و پێویستی بە ڕەزامەندی کۆنگرێسە.

ڕەخنەگران ئەم هەنگاوانە بە فرۆشتنی مافی نیشتەجێبوون یان مانەوە لە ئەمریکا دەبینن، کە دەتوانێت کاریگەری نەرێنی لەسەر بنەماکانی یەکسانی و دادپەروەری کۆمەڵایەتی هەبێت و ئاماژە بەوە دەکەن کە ڕێگەدان بە خەڵک بۆ ئەوەی ڕیز ببڕن دەکرێت کێشەی یاسایی لێبکەوێتەوە.

لە لایەنێکی دیکەوە، ترەمپ بڕیارێکی کارگێڕی واژۆ کردووە کە باجێکی زۆر ساڵانە دەخاتە سەر وەرگرانی ڤیزای H-1B، کە ڤیزایەکی نانێشتەجێییە و ڕێگە بە پسپۆڕانی بیانی خاوەن توانای تایبەت وەک زانا، ئەندازیار، یان پرۆگرامساز دەدات بۆ ماوەیەکی دیاریکراو لە ئەمریکا کار بکەن. ئامانج لەم ڕێکارە هاتنی کەسانی زۆر شارەزایە بۆ ئەمریکا، بەڵام جگە لە لێهاتووەکەیان لە هەمان کاتدا دەبێت پارە بدەن.

ئەم هەنگاوە وەک هەوڵێک سەیر دەکرێت بۆ پاراستنی هەلی کار بۆ کرێکارانی ئەمریکی، بەو پێیەی پشتیوانانی ئەم بڕیارە پێیان وایە ڤیزای H-1B ڕێگە بە کۆمپانیاکان دەدات کرێکارانی بیانی بە مووچەی کەمتر دامەزرێنن و ڕکابەری لەگەڵ کرێکارانی ناوخۆدا بکەن. پێشتر ساڵانە ژمارەیەکی یەکجار زۆر ڤیزای H-1B لە ڕێگەی سیستمێکی دیاریکراوەوە دەبەخشرا، بەڵام ئێستا ئیدارەی ترەمپ کۆتوبەندی نوێی بۆ سەر بەرنامەکە داناوە بە جۆرێک هاتنی بیانی لەو ڕێگەیەوە سنووردار کراوە.

بەڵام لایەنگرانی پرۆگرامی H-1B، بەتایبەتی لە کەرتی تەکنەلۆژیادا، بەپێچەوانەوە دەڵێن کە ئەم ڤیزایە زۆر گرنگە بۆ پڕکردنەوەی کەلێنی پسپۆڕی لە بوارەکاندا کە ئەمریکا خۆی ژمارەی پێویستی لەو شارەزاییانە نییە. کۆمپانیا زەبەلاحەکانی وەک ئەمازۆن ساڵانە داوای هەزاران ڤیزای H-1B دەکەن. زیادکردنی باجێکی لەم شێوەیە دەتوانێت کاریگەرییەکی بەرچاوی لەسەر توانای ئەو کۆمپانیا گەورانە و تەنانەت کۆمپانیا بچووکەکانیش هەبێت بۆ ڕاکێشانی بەهرەمەندانی جیهانی، کە لە کۆتاییدا دەکرێت گەشەسەندنی کەرتی تەکنەلۆژیای ئەمریکا خاو بکاتەوە.هەر لەبەر ئەم هۆکارانەییە ئەم بڕیارە نوێیەی ترەمپ، کۆمپانیا گەورەکانی ئەمریکای نیگەران کردووە.

لە بەشێکی دیکەی ئەم سیاسەتە نوێیەی ترەمپ، هاتنی قوتابیانی نێودەوڵەتیش بۆ خوێندن لە ئەمریکا سنووردار کراوە. ئەوەش لە ڕێگەی قەدەغەکردنی هاوڵاتییانی ژمارەیەک وڵاتی دیاریکراو و دانانی مەرجی قورسیش بۆ هاوڵاتییانی وڵاتانی دیکە. ئەم هەنگاوە دەتوانێت کاریگەرییەکی نەرێنی لەسەر زانکۆ و پەیمانگاکانی ئەمریکا هەبێت، کە بەشێکی زۆری داهات و ناوبانگیان لەسەر بنەمای هاتنی قوتابیانی نێودەوڵەتی دامەزراوە.

ئەم سیاسەتە هاوتایە لەگەڵ هەوڵەکانی تری ئیدارەی ترەمپ بۆ زیادکردنی داهاتی گەنجینەی حکومەت بە شێوازگەلێکی نوێ و بێپێشینە. لە کاتی دەستبەکاربوونییەوە، ترەمپ ملیارەها دۆلاری لە ڕێگەی گومرگ و باجی نوێوە کۆکردووەتەوە.

لە کۆتاییدا، سیاسەتە کۆچبەرییەکانی ترەمپ، بە تایبەت پرۆگرامەکانی کارتی زێڕین، گۆڕانکارییەکانی H-1B، و سنووردارکردنی قوتابیانی نێودەوڵەتی، ئاماژەیەکن بۆ گۆڕانێکی بنەڕەتی لە دیدگای حکومەت بەرامبەر بە کۆچبەری و ویستی پسپۆڕان و قوتابیان بۆ کارکردن و ژیانکردن لە ئەمریکا. لە کاتێکدا کە "کارتی زێڕین" دەروازەیەک بۆ سەرمایەدارانی دەوڵەمەند دەکاتەوە و ئامانجی ڕاکێشانی سەرمایەیە، باجی H-1B و سنووردارکردنی قوتابیان هەوڵ دەدەن سنوورێک بۆ هاتنی پسپۆڕان و قوتابیان دابنێن، بە بیانووی پاراستنی هەلی کار و بەرژەوەندی نیشتمانی. ئەم ڕێچکە جیاوازانە، مشتومڕێکی گەرم لەسەر پێوەرەکانی بەهای کۆچبەرێک بۆ ئەمریکا، کاریگەرییە ئابوورییەکان لەسەر کەرتی تەکنەلۆژیا و دامەزراوە پەروەردەییەکان، و ئاکارە کۆمەڵایەتییەکانی فرۆشتنی مافی نیشتەجێبوون دروست دەکات. کاریگەرییە درێژخایەنەکانی ئەم بڕیارانە، بەتایبەتی لەسەر هەمەجۆری ئابووری و کۆمەڵایەتی و تەنانەت ناوبانگی ئەمریکا وەک لانکەی ئازادی و دەرفەت، لە داهاتوودا زیاتر دەردەکەون و چاودێرییەکی ورد و چەندین سکاڵای یاسایی دەخوازن.