مامۆستای سیاچەمانە؛ کێشەی لە قسەکردندا هەیە بەڵام 'کەو' ئاسا سیاچەمانە دەچڕێت

ئاڤا نیوز

 

ئەوەی پێویستە بیزانیت: مامۆستا عەتا زەڵمی، کە ناوی تەواوی عەتا شەریف ئەمینە و لە ساڵی 1956 لە گوندی زەڵم لەدایکبووە، یەکێکە لە دەنگە خۆش و دیارەکانی ناوچەی هەورامان. هەرچەندە مامۆستا عەتا لە کاتی قسەکردندا کەمێک زمانی دەگیرێت و لەڕووی قسەکردنەوە کێشەی هەیە، بەڵام ئەمە بە هیچ شێوەیەک نەبووەتە لەمپەرێک لەبەردەم بەهرە هونەرییە بێوێنەکەیدا.

مامۆستا عەتا زەڵمی بە توانایەکی زۆرەوە بە قورسترین شێوازی گۆرانیی هەورامی کە "سیاچەمانە"یە دەچڕێت، وەک خۆی باس دەکات "بە منداڵی هەستم دەکرد کە زمانم دەگیرێت". ئەم هونەرمەندە گەورەیە هاوشانی هونەرمەندانی ناوداری وەک حەمەحسێن کێمنەیی، عوسمان هەورامی و جەمیل نەوسوودی، شوێنپەنجەی خۆی لەسەر هونەری ڕەسەنی هەورامان جێهێشتووە و دەنگە زوڵاڵەکەی لە باخە چڕ و فێنکەکانی چەمی زەڵمدا دەنگ دەداتەوە.