ئاڤای خەڵک؛ قوتابییانی قوتابخانەی نابیستان لە هەولێر داواكارییان هەیە و ئاڤا دەیگەیێنێت

ئاڤا نیوز

قوتابیانی قوتابخانەی نابیستان لە شاری هەولێر کێشەی درێژەدان بە خوێندنیان هەیە، دوای ئەوەی ئاڤا دەنگیان دەگەیەنێت چارەسەریان بۆ دیاریی دەکرێت. 

چیرۆکی سەرەکی: لە گەڕەکی هەڤاڵانی شاری هەلێر قوتابخانەی نابیستان هەیە کە تەنیا پۆلی یەک تا نۆی بنەڕەتی تێدایە، ژمارەیەك لە باوك و دایكی قوتابیانیش پەیوەندییان بە ئاڤاوە كردووە و دەڵێن، قوتابخانەکە پۆلەکانی 10 و 11 و 12ی تێدا نییە، هیچ پەیمانگایەکیش نییە تا قوتابییەکانمان دوای تەواوکردنی پۆلی نۆ تێدا درێژە بە خوێندن بدەن، داواکارین دەنگمان بە لایەنی پەیوەندیدار بگەیەندرێت.

لێدوانی فەرمی: تانیا جەمال غەریب، سەرپەرشتیاری پەروەردە لە وەزارەتی کار و کاروباری کۆمەڵایەتی، لەوبارەیەوە بە ئاڤای ڕاگەیاند: یاداشتێکی لێكتێگەیشتنمان لەگەڵ وەزارەتی پەروەردە هەیە، قوتابیانی نابیست دەتوانن دوای تەواوکردنی قۆناغی نۆی بنەڕەتی لە پەیمانگاکانی هونەرەجوانەکان و کۆمپیوتەر، یان ئامادەییە پیشەییەکان درێژە بە خوێندن بدەن.

تانیا جەمال غەریب دەشڵێ، هەر قوتابییەكی نابیست دوای تەواوکردنی قۆناغی نۆی بنەڕەتی ئەگەر خواستی لەسەر درێژەدان بە خوێندن هەبێت و گرفتی بۆ دروست بوو، ئەوا با پەیوەندییم پێوە بكات یان سەردانم بکات، هاوكاری و كارئاسانی بۆ دەكەین گرفتەكەی بۆ چارەسەر دەكەین.