پەرلەمانتارێک بۆ ئاڤا: دانیشتنی ڕۆژی چوارشەممەی پەرلەمان ناکرێت

ئاڤا نیوز

ئه‌حمه‌د شه‌رمانی، پەرلەمانتاری عێراق، ئاشکرای کرد،  وێرای ئه‌وه‌ی به‌رنامه‌ی كاری دانیشتنی پەرلەمان بۆ ڕۆژی چوارشه‌ممه‌ی داهاتوو بڵاوکراوەتەوە، به‌ڵام دانیشتنەکە بەهیچ شێوەیەک ناکرێت.

چیرۆکی سەرەکی: ئه‌مڕۆ دووشەممە 29-9-2025 په‌رله‌مانی عێراق بەرنامەی کاری دانیشتنی‌ رۆژی چوارشه‌ممه‌ی داهاتوو، 1-10-2025 ـی بڵاوکردەوە،  کە 11 پڕۆژه‌ یاسا بۆ گفتوگۆ و ده‌نگدان لەخۆ دەگرێت.

لێدوانی فەرمی: ئه‌حمه‌د شه‌رمانی، پەرلەمانتاری عێراق بەئاڤا میدیای ڕاگەیاند: بەهۆی شکانی ڕێژەی یاساییەوە، ڕۆژی چوارشەممەی داهاتوو دانیشتنی پەرلەمانی عێراق ناکرێت، چونکە ئیراده‌یه‌كی سیاسیی راسته‌قینه‌ بۆ دووباره‌ كاراكردنه‌وه‌ی رۆڵی په‌رله‌مان و به‌ڕێوه‌بردنی دانیشتنه‌كان نییە.

زانیاریی زیاتر: شه‌رمانی،‌ روونی كرده‌وه‌، نه‌بوونی سازان له‌نێوان لایەنە‌ سیاسییه‌كان و قووڵبوونه‌وه‌ی ناكۆكییه‌كان له‌سه‌ر چەندین بابەت، وای کردووە رێژه‌ی یاسایی پێویست بۆ به‌ڕێوه‌چوونی دانیشتنه‌كان تەواو نەکرێت و گه‌ڕانه‌وه‌ی په‌رله‌مان بۆ رۆڵی سروشتی خۆی پێویستی به‌ لێكتێگه‌یشتنی جددی و ئیراده‌یه‌كی سیاسی هه‌یه، ئه‌گه‌رنا په‌كخستنی دانیشتنه‌كان تا كۆتاییهاتنی خولی ئێستا به‌رده‌وام ده‌بێت.

ئەمەش بزانە: بەهۆی ناکۆکی نێوان فراکسیۆنەکانی پەرلەمان لە 25-8-2025 ـەوە بەهۆی نەبوونی ڕێژەی یاساییەوە کۆبوونەوەکانی پەرلەمانی عێراق پەکی کەوتووە و ئەگەری هەیە چەندین پڕۆژە یاسا کە خوێندنەوەی یەکەم و دووەمی بۆ کراوە بۆخۆلی داهاتووی پەرلەمان بگواسترێتەوە.