سەدر دیاردەی چەکداری لە سەرایا سەلام و خۆپیشاندان لە لایەنگرانی قەدەغە دەکات

ئاڤا نیوز

 

ڕێبەری ڕەوتی نیشتمانی شیعی (ڕەوتی سەدری پێشوو) دەڵێت، بۆ ئەوەی ڕێگریی بکات لە گەندەڵکاران و ئەوانەی هەوڵی ئاژاوەنانەوە دەدەن، بڕیاریداوە دیاردەی چەکداری لە ناو هێزەکانی سەرایا سەلام و گردبوونەوە و خۆپیشاندانیش لە لایەنگرانی قەدەغە بکات.

 

چیرۆکی سەرەکی: عەلی فازل، چالاکوانی "ئۆپۆزسیۆن"، لە پڕۆگرامێکدا کە لە تۆڕە کۆمەڵایەتییەکان پێشکەشی دەکات، ئاماژەی بەوە کردبوو کە زانیاری هەیە لەبارەی نیازی یاسر مالیکی، پەرلەمانتاری هاوپەیمانیی دەوڵەتی یاسا، بۆ تیرۆرکردنی سەدر لە کاتی سەردانیکردنی بۆ گۆڕی باوکی لە نەجەف بە بەکارهێنانی فڕۆکەیەکی بێفڕۆکەوان، ئەم هەواڵەش لایەنگرانی سەدری توڕەکرد و لە بەسڕە و چەند شارێکی دیکەی عێراق دەستیان بە خۆپیشاندان کرد.

 

ڕاگەیێنراوی فەرمی: موقتەدا  سەدر، ڕێبەری ڕەوتی نیشتمانیی شیعی لە پەیامێکدا ئاماژەی بەوەشكردووە، بۆ ڕێگریی لە گەندەڵکاران و ڕێگریکردن لەو ئاژاوەیەی کە گەندەڵەکان بەدوایدا دەگەڕێن، بڕیاریداوە هەموو جۆرە دیاردەیەکی چەکداری تەنانەت لەناو هێزەکانی سەرایا سەلامیش قەدەغە بکات تەنیا لەو شوێنانە نەبێت بەرکەوتنی ڕاستەوخۆی ئەو ‌هێزە لەگەڵ تیرۆر هەیە.

 

سەدر دەشڵێت، بڕیاریداوە بۆ هەمان مەبەست گردبوونەوە و خۆپیشاندانی ئاشتییانەش لە لایەنگرانی قەدەغە بکات.