G7 داوا دەکات ئێران ڕاستەوخۆ لەگەڵ ئەمریکا دانوستان بکات

ئاڤا نیوز

وەزیرانی دەرەوەی حەوت وڵاتی پیشەسازی جیهان، (G7) ڕاگەیێنراوێکی هاوبەشیان بڵاوکردەوە و داوایان لە ئێران کرد دەستبەجێ گفتوگۆی ڕاستەوخۆ لەگەڵ ئەمریکا بکات و هەنگاوی جددی بنێت بۆ ئەوەی بە تەواوی پابەند بێت بە بەڵێنە ئەتۆمییەکانی.

ڕاگەیێنراوی فەرمی: لە ڕاگەیێنراوێكدا کە لەلایەن وەزیرانی دەرەوەی کەنەدا، فەرەنسا، ئەڵمانیا، ئیتاڵیا، ژاپۆن، بەریتانیا، ئەمریکا و یەکێتی ئەوروپا واژۆی لەسەر کراوە، ئاماژە بەوە کراوە کە دیپلۆماسی هەر وا بەپێویستی دەمێنێتەوە.

زانیاریی زیاتر: ئەندامانی G7 پێداگرییان کردووە لەسەر پێویستی هاوکاریکردنی دەستبەجێی ئێران لەگەڵ ئاژانسی نێودەوڵەتی وزەی ئەتۆمی و دەستپێکردنەوەی پشکنینەکان و پێشکەشکردنی شەفافیەت سەبارەت بە ڕادەی کۆگاکانی ماددە ئەتۆمییەکان، بەتایبەتیش یۆرانیۆمی زۆر پیتێنراو.

لەلایەکی دیکەوە: فاتیمە موهاجەرانی، وتەبێژی حکومەتی ئێران ڕایگەیاندووە کە هەمیشە ئاڵوگۆڕی پەیام لە نێوان ئێران و ئەمریکا هەم ڕاستەوخۆ و هەم ناڕاستەوخۆ هەبووە و بەردەوامە و ئێران هەموو هەوڵێکی داوە، بەڵام بێبەڵێنی و  زیادەڕەوییەکانیان ڕێگرن لە بەردەم ڕێککەوتندا.