عێراق و BP بەریتانی پەرە بە کێڵگە نەوتی و گازییەکانی کەرکووک دەدەن

ئاڤا نیوز

عێراق بە فەرمی گرێبەستێکی گەورەی بۆ پەرەپێدانی چوار کێڵگەی نەوتی کەرکووک و دامەزراوەکانی گازی لەگەڵ کۆمپانیای BP بەریتانی کاراکرد.

چیرۆکی سەرەکی: بە چاودێری حەییان عەبدولغەنی، جێگری سەرۆکوەزیران بۆ کاروباری وزە و وەزیری نەوت، گرێبەستی پەرەپێدانی چوار کێڵگەی نەوتی کەرکووک لەگەڵ کۆمپانیای BP بەریتانی کاراکرا، کێڵگە نەوتییەکان بریتین لە (بابا گوڕگوڕ و ئاڤانا، جەمبوور، بای حەسەن و خەباز).

ڕاگەیێنراوی فەرمی: بەگوێرەی ڕاگەیێنراوی وەزارەتی نەوتی عێراق، وەزیری نەوت، ئامانجی ئەم گرێبەستە زیادکردنی بەرهەمی نەوتی خاو و گازی هاوەڵە بۆ 328 هەزار بەرمیل لە ڕۆژێکدا، هاوکات دابینکردنی سووتەمەنی بۆ وێستگە کارەباییەکان و پیشەسازییە ناوخۆییەکان.

لەهەمان کاتدا: ئەم پڕۆژەیە وەک دەستپێکێک بۆ پەرەپێدانی زیاتر هەژمار دەکرێت و هیوای ئەوەی لێدەکرێت کە هەلی کار لە کەرکووک و ناوچەکانی دەوروبەری بڕەخسێنێت.

لەلایەکی دیکەوە: زەید یاسری، بەڕێوەبەری کۆمپانیای BP لە عێراق، کاراکردنی گرێبەستەکەی بە هەنگاوێکی گرنگ زانی بۆ بەهێزکردنی هاوکاری لەگەڵ کۆمپانیاکانی نەوتی باکوور و گازی باکوور، بۆ گەیشتن بە ئامانجی زیادکردنی بەرهەمی وزە.