سوپاسالاری ئێران: لە ئەوپەڕی ئامادەباشیداین بۆ جەنگ

ئاڤا نیوز

سوپاسالاری ئێران ئامادەباشیی هەموو هێز و سوپا بۆ جەنگ و بەرگری و بەرپەرچدانەوەی هێرشەکان ڕادەگەیەنێت و هەڕەشەی شکستی گەورە لە ئیسرائیل و ئەمریکا دەکات.

وێنە گەورەکە: دوای دووبارە چالاککردنەوەی سزاکان لە لایەن ئەنجوومەنی ئاسایشی نێودەوڵەتییەوە بۆ سەر ئێران، ئیسرائیل و ئەمریکا پێشبینی خێراترکردنی  پرۆسەی پیتاندنی یۆرانیۆم و هەوڵدان بۆ چەکی ئەتۆم دەکەن لەلایەن تارانەوە.

بنیامین نەتانیاهۆ، سەرۆکوەزیرانی ئیسرائیل لە چەند ڕۆژی ڕابردوودا ڕایگەیاندبوو کە شوێنی یۆرانیۆمی پیتێندراوی ئاست بەرزی ئێران دەزانن و دۆناڵد ترەمپ، سەرۆکی ئەمریکا ئاگادار دەکەنەوە و هەموو کارێکی پێویست دەگیرێتە بەر، لە بەرامبەردا بەرپرسانی باڵای سەربازی ئێران هۆشداری تووند دەدەن لە ئەگەری هەر هێرشێک بۆ سەر خاکی ئێران.

لێدوانی فەرمی: عەبدولڕەحیم موسەوی، سوپاسالاری ئێران وەڵامی ئەو ئەگەرانەی دایەوە سەبارەت بە دەستپێکردنەوەی جەنگ و ڕایگه‌یاند، سوپای ئێران لە ئەوپەڕی ئامادەباشیدایە و ئامادەیی و توانای بەرپەرچدانەوەی هەموو هێرشێکی هەیە بۆ سەر هەر پێگە و بنکەیەکی سەربازی، لە ئەگەری هەر هێرشێکدا دەستبەجێ سوپای ئێران وەڵامی دەبێت،  لە هەمان کاتدا محەممەد جەعفەر ئەسەدی، سەرکردە لە سوپای پاسداران ڕایگەیاند، مووشەکەکانی ئێران دەگەن بەو ئامانجانەی کە تاران دەیەوێت، مووشەکی سجیل دەتوانێت دڵی دوژمنانی ئێران بکاتە ئامانج و بیپێکێت.

لەلایەكی دیكەوە: محەممەد باقر قالیباف، سەرۆکی پەرلەمانی ئێران سەبارەت بە ئەگەری هێرشی ئیسرائیل و ئەمریکا بۆ سەر وڵاتەکەی ڕایگەیاند، گەر بێتو کارێکی لەو شێوەیە ڕووبدات، ئێران ئارامی سەربازی دەشکێنێت و بەرەی نوێی جەنگ دەکاتەوە و دووژمن تووشی شکستی گەورە دەکات.