ئێران بەنیازە سەدان هەزار پەنابەری ئەفغانی بەرەو عێراق ڕەوانە بکات

ئاڤا نیوز

بەپێی ڕۆژنامەیەکی بەریتانی، ئێران بەنیازە سەدان هەزار پەنابەری ئەفغانی لە سنوورەکانی ڕۆژئاوای لەگەڵ عێراق و تورکیا ئازاد بکات، ئەوەش بەمەبەستی ڕەوانەکردنیان بەرەو وڵاتانی ئەوروپا لەڕێگەی ئەو دوو وڵاتەوە .

چیرۆکی سەرەکی: ڕۆژنامەی گاردیانی بەریتانی ئاشکرای کرد، بە ئامانجی جێگیرکردنیان وەک پەنابەر لەوڵاتانی ئەوروپا، ئێران خەریکی لێکۆڵینەوەیە لەبارەی ڕەوانەکردنی سەدان هەزار پەنابەری ئەفغانی لە سنوورەکانی ڕۆژئاوایەوە بەرەو عێراق و تورکیا، ئەمەش وەک کاردانەوەیەک دژی دووبارە سەپاندنەوەی سزاکانی ئەوروپا بەسەر وڵاتەکەی لەلایەن نەتەوەیەکگرتووەکانەوە.

ڕاگەیێنراوی فەرمی: ڕۆژنامەکە ڕایگەیاند: تا مانگی ئازاری 2025، ڕێگە بە سەدان هەزار ئەفغانی دراوە بە شێوەیەکی کاتی لەئێران  نیشتەجێبن، ئەوەش لە ڕێگەی بەدەستهێنانی بەڵگەنامەی سەرژمێری دانیشتووان، بێ ئەوەی مافی چاودێری تەندروستی حکومی، خوێندنی گشتی، مۆڵەتی کارکردن، خزمەتگوزاریی بانکی و ئەنجامدانی گرێبەستی کرێنشینییان هەبێت، بەڵام دەسەڵاتدارانی ئێران لەم قۆناغەدا  ئەم ڕێکارانەی هەڵوەشاندووەتەوە.

لەلایەکی دیکەوە: ڕێکخراوی لێبوردنی نێودەوڵەتی ڕایگەیاندووە، تاران ژمارەی جیاواز سەبارەت بە پەنابەرانی ئەفغانی کە بەهۆی هەژاری یان دەسەڵاتی تاڵیبانەوە هەڵهاتبوون بۆ وڵاتەکەیان پێشکەش کردووە، بەپێی زانیارییەکانیش لانیکەم دوو ملیۆن پەنابەری ئەفغانی بە شێوەیەکی نایاسایی لە ئێران بوونیان هەیە.