پڕۆژەی ئاوی دەربەندیخان تەواو دەکرێت

ئاڤا نیوز

دوای وەستانی بۆ ماوەی شەش ساڵ، کارکردن لە پڕۆژەی ئاوی دەربەندیخان دەستپێدەکاتەوە و بڕیارە لە ماوەی 9 بۆ 10 مانگ تەواو بکرێت.

چیرۆکی سەرەکی: پڕۆژەی ئاوی دەربەندیخان لە ساڵی 2014 دەست بە دروستكردنی كرا، بەڵام بەهۆی گرفتی داراییەوە لە ساڵی 2019 كاركردن تێیدا وەستا، لە ناوەڕاستی مانگی حەوتی ئەمساڵ بڕیار لەسەر دەستپێکردنەوەی کارەکانی و تەواو کردنی درا.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت: گوژمەی یەکەمی پارە بە بەڵێندەر دراوە، کارەکانی خاوێنکردنەوە و خۆڕێکخستنەوە دەستیان پێکردووە، هەندێک ئامێری میکانیکی و کارەبایی گواستراونەتەوە سەر پڕۆژەکە، بڕیارە لە ماوەی 9 بۆ 10 مانگی داهاتوو پڕۆژەکە تەواو بکرێت.

زانیاریی زیاتر: پڕۆژەکە توانای بەرهەمهێنانی هەزار مەترسێجا ئاوی خاوێنی هەیە لە کاتژمێرێکدا، دەتوانرێت لە داهاتوو 500 مەترسێجای دیکە توانای پڕۆژەکە بەرز بکرێتەوە.

بۆچی گرنگە: بە تەواوکردنی ئەم پڕۆژەیە كێشەی كەمئاوی و کوالێتی ئاوی خواردنەوە لە دەربەندیخان چارەسەر دەبێت و 75 هەزار هاونیشتمانی لێی سوودمەند دەبن.