هێزەکانی سووریا گەڕەکەکانی شێخ مەقسود و ئەشرەفیەی حەلەب "ئابڵوقە" دەدەن

ئاڤا نیوز

میدیای ڕۆژئاوای کوردستان دەڵێت، ئێوارەی ئەمڕۆ  هێزەکانی حکومەتی سووریا گەڕەکەکانی شێخ مەقسود و ئەشرەفیەیان لە ناوەندی شاری حەلەبی باکووری سووریا "ئابڵوقە" داوە و هەموو دەروازەکانی هاتووچۆیان داخستوون.

 وێنە گەورەکە: 1ی نیسانی ئەمساڵ هەسەدە بەگوێرەی ڕێککەوتنێک لە هەردوو گەڕەکی شێخ مەقسود و ئەشرەفیەی حەلەب کشایەوە و تەنیا هێزەکانی ئاسایش مانەوە، بەڵام لەو کاتەوە ناوەناوە گرژیی لەنێوان هێزەکانی ئاسایش و گرووپە چەکدارەکانی سەر بە دیمەشق دروستدەبێت، ئیدارەی خۆسەریش دەڵێت، هێزەکانی دیمەشق دەیانەوێت هێرشبکەنەسەر ئەو دوو گەڕەکە کوردییە.

 
زانیاریی بەدەستهاتوو: میدیاكانی ڕۆژئاوای کوردستان بڵاویان کردەوە، ئێوارەی ئەمڕۆ هێزەکانی سەر بە حکومەتی سووریا هەموو دەروازەکانی ناوەوە و دەرەوەی هاتووچۆیان بۆ هەردوو گەڕەکی شێخ مەقسود و ئەشرەفیەی حەلەب داخست، دوای ئەوەی لە ڕۆژانی ڕابردوودا لەنزیک ئەو دوو گەڕەکە خاڵی چاودێریی و ڕووبەڕووبوونەوەیان داناوە و ئەمڕۆش ڕێگاکانی چوون بۆ ئەو دوو گەڕەکەیان داخستووە.