ئاڤای خەڵک؛ ژمارەیەک پێشمەرگە 15 ساڵە داوای ڕێگەپێدان بۆ دروستکردنی خانوو دەکەن

ئاڤا نیوز

 

ژمارەیەک پێشمەرگە لە گەڕەکی گەڕەسۆری سەر بە قەزای بنەسڵاوە، دوای 15 ساڵ لە وەرگرتنی کارتی زەوی، هێشتا چاوەڕێی ڕێگەپێدانن بۆ دروستکردنی خانوو لەسەر زەوییەکانیان. ئەوان کە بەشێکی زۆریان کرێچین، داوا دەکەن ڕێگەیان پێبدرێت سوود لەو زەوییانە وەربگرن کە مافی خۆیانە و کۆتایی بە کرێچێتییان بهێنن.

لێدوانی فەرمی: جوان ڕەفیق، قایمقامی قەزای بنەسڵاوە، لە لێدوانێکدا بۆ ئاڤا نیوز ڕایگەیاند، "ئەو زەوییانەی کە تەنها کارتیان هەیە و تاپۆ نین، لەلایەن وەزارەتی شارەوانییەوە ڕێگەپێدانی دروستکردنی خانوویان وەستێنراوە ناوبراو ئاماژەی بەوەشکرد کە نووسراویان بۆ لایەنە پەیوەندیدارەکان کردووە بە مەبەستی چارەسەرکردنی ئەم کێشەیە و ڕێگەدان بەو پێشمەرگانە کە خانووی خۆیان دروست بکەن.

 

لەلایەکی دیکەوە؛ سەربەست مەولود، بەڕێوەبەری بەشی یاسایی لە وەزارەتی شارەوانی، جەختی لەوە کردەوە کە "ئەو زەوییانەی کە سەنەدیان هەیە، دەبێت خاوەنەکانیان بیخەنە سەر ناوی خۆیان، ئینجا ڕێگەپێدانی خانوویان پێدەدرێت."

هەروەها گوتیشی، "بەشێک لە زەوییەکان کێشەی نەبوونی ڕووپێوی، سەرەبلۆک و خزمەتگوزارییان هەیە جۆرێکی دیکەی کێشەکان، بە وتەی بەڕێوەبەری یاسایی، پەیوەستە بەو زەوییانەی کە وەک قەرەبوو دراون بە جووتیاران و پێویستیان بە بڕیاری لیژنەی تایبەتمەند هەیە.