عەبادی بۆ ئاڤا: نابێت هاووڵاتییانی کوردستان لە خێروبێری عێراق بێبەش بکرێن

ئاڤا نیوز

حەیدەر عەبادی، سەرۆکی هاوپەیمانیی نەسر ڕێککەوتنی نەوتی نێوان هەولێر و بەغدای بەرز نرخاند و بە ڕێککەوتنێکی  "سوودبەخش بۆ هەردوولا" ناوی برد.

 

وێنە گەورەکە: دوای زیاتر لە دوو ساڵ و شەش مانگ لە وەستانی، بەرەبەیانیی ڕۆژی شەممە 27ـی ئەیلوولی 2025 جارێكی دیكە هەناردەکردنی نەوتی هەرێمی کوردستان دەستیپێكردەوە، ئەوەش لە چوارچێوەی رێککەوتننامەی نێوان بەغدا و هەولێر و کۆمپانیاکانی نەوت، کە تێیدا بڕیاردرا هەرێمی کوردستان 190 هەزار بەرمیل نەوت ڕۆژانە ڕادەستی حکومەتی فیدراڵی بکات، لەبەرامبەردا بەغدا پابەند دەبێت بە پێدانی هەموو شایستە داراییەکانی هەرێمی کوردستان کە لەچوارچێوەی ڕێککەوتنەکە هاتووە.

 

لیدوانی فەرمی: حەیدەر عەبادی بە هیشام سەعید پەیامنێری ئاڤا میدیای ڕاگەیاند: ڕێککەوتننامەی نێوان هەولێر و بەغدا سەبارەت بە نەوت، ڕێککەوتنێکی نایابە و ئێمە بەردەوام هانمانداوە و بۆ هەردوولاش سوودبەخشە، ئەوەی پەیوەستە  بە بەغداوە، ئەو نەوت بەدەست دەهێنێت و لە بەرامبەردا مووچەی فەرمانبەران دەدات، بەڵام لە ڕابردوودا نە نەوتی دەست دەکەوت و نە مووچەی فەرمانبەرانیشی دەنارد.

 

زانیاریی زیاتر: هاووڵاتییانی هەرێمی کوردستان هاووڵاتیی عێراقین و نابێت لە ئیمتیازات و خێروبێری عێراق بێبەش بکرێن، نەوتیش موڵکی هەموو گەلی عێراقە.

 

چاره‌سه‌ره‌كان: سەبارەت بە بابەتی داهاتە نانەوتییەکان لە نێوان هەرێمی کوردستان و حکومەتی عێراقیدا، عەبادی وتی: وەک بەڕێز مەسروور بارزانی، سەرۆکوەزیرانی هەرێمی کوردستان، پێی ڕاگەیاندم، ئەوان "هەنگاویان بۆ چەسپاندنی پێناسی گومرکی لەسەر ئەم داهاتانە هاوشێوەی بەغدا ناوە و پشت بەخوا لەم چوارچێوەیەدا چارەسەر دەبێت".