مەسرور بارزانی ستایشی مامۆستایان و قوتابیان دەکات: داهاتووی کوردستان لە دەستێکی ئەمیندایە

ئاڤا نیوز

 

سەرۆکوەزیران مەسرور بارزانی دوای کردنەوەی 29 قوتابخانە و باخچەی ساوایان دڵخۆشی خۆی بە "ئاست و ڕەوشت بەرزی مامۆستایان و قوتابیان" نیشداندا  و گوتی، "زۆر دڵنیام داهاتووی کورستان لە دەستێکی ئەمیندایە."

 

چیرۆکی سەرەکی: ئەمڕۆ چوارشەممە 8-10-2025، سەرۆکوەزیران مەسرور بارزانی لە شاری هەولێر لە قوتابخانەی گوندی ئارام دوو قردێلەی کردنەوەی 29 قوتابخانە و باخچەی ساوایانی بڕی، 25 یان قوتابخانەن و چواریشیان بەخچەی ساوایانن.

 

لێدوانی فەرمی: سەرۆکوەزیران مەسرور بارزانی گوتی: خۆشحاڵم بە کردنەوەی 29 قوتابخانە و باخچەی ساوایان، پیرۆزبایی لە قوتابیان و مامۆستایان دەکەم، دەستخۆشی لە مامۆستایان دەکەم بۆ ماندووبوون و پشوودرێژی و خزمەتیان بۆ پێگەیاندنی نەوەی داهاتووی گەلەکەمان.

 

- ئەمەی ئەمڕۆ بینیم جێگەی دڵخۆشی یەکجار گەورە بوو، قوتابخانەیەک بەم ئاستە جوان و بەرزە دروست کراوە، بە هیوام سەرمایەداران هاوکاریی وەزارەتی پەروەردە بکەن بۆ ئەوەی باڵەخانەی هاوشێوە لە سەرجەم ناوچەکان دروست بکرێن.

- بەم ئاست و ڕەوشتە بەرزەی مامۆستایان و قوتابیان زۆر دڵنیام داهاتووی کورستان لە دەستێکی ئەمیندایە، ئومێدی زۆرم بەم قوتابیە چاوگەشانە هەیە دەتوانن دەسکەوتی زۆر گەورەتر بۆخۆیان و بۆ وڵاتەکەیان بەدەست بهێنن.

-  هەندێ قوتابخانە پێویستیان بە نۆژەنکردنەوە هەیە، پێویستمان بە دروست کردنی قوتابخانەی نوێ هەیە، بەڵام لەم ماوە کورتە توانیومانە ئاستی قوتابخانەکان زۆر بەرز بکەینەوە.

-  توانیومانە سیستمی خوێندن و پەروەردە و فێرکردن بە جۆری دیجیتاڵی کردن و ئی پەروەردە بەرەوپێش ببەین و کە کاریگەری زۆری دروست کردووە و بەردەوام دەبین لە پشتگیریی وەزارەی پەروەردە بۆ بەرەوپێشبردنی زیاتری خوێندن و پەروەردە.

 

ژمارەکان وادەڵێن: جگە لە کردنەوەی ئەم 29 قوتابخانە و باخچەی ساوایانەی ئەمڕۆ کرانەوە، لە کابینەی نۆیەم ئەم پرۆژانە لە کەرتی پەروەردە جێبەجێ کراون: 

-  127 قوتابخانە کارەبای وزەی خۆریان بۆ دابین کراوە.
-  هەزار و 670 قوتابخانە نۆژەن کراونەتەوە.
-  214 قوتابخانەی دروست کراون.
-  629 ژووری نوێ لەناو قوتابخانەکان بەجیا دروست کراون.
-  کۆی گشتیی چوار هەزار و 441 هۆبەی خوێندن دروست کراون.
-  شوێنی نوێ بۆ 110 هەزار قوتابی دروست کراوە.
-  سێ دەوامی لە 139 قوتابخانە کراوەتە 11 قوتابخانە.
-  33 هەزار و 341 قوتابی دابڕاو گەڕێنراونەتە بەر خوێندن.