پارتی دوو بارەگای دیکە لە کەرکووک دەکاتەوە

ئاڤا نیوز

 

ئەمڕۆ پارتی دیموکراتی کوردستان دوو بارەگای دیکە لە کەرکووک دەکاتەوە و شەممەی داهاتووش کەرنەڤاڵێکی جەماوەری بۆ ناساندنی کاندیدانی لەچوارچیوەی هەڵمەتی بانگەشەی هەڵبژاردن بۆ پەرلەمانی عێراق ڕێکدەخات.

 

وێنە گەورەکە: لە دوای ڕووداوەکانی 16ی ئۆکتۆبەری ساڵی 2017 سەرجەم بارەگاکانی پارتی دیموکراتی کوردستان لە کەرکووک دەستیان بەسەرداگیرا، هەرچەند هێشتا بارەگاکانی پارتی ڕادەستی نەکراونەتەوە، بەڵام ئەم حیزبە ڕێکخستنەکانی بردووەتەوە کەرکووک و ئەمساڵیش بە شێوەیەکی فەرمی بارەگای مەکتەبی ڕێکخستنی کەرکووک-گەرمیانی لە کەرکووک کردەوە.

 

لێدوانی فەرمی: هیوا ئەحمەد مستەفا، ئەندامی مەکتەبی سیاسی و بەرپرسی مەکتەبی ڕێکخستنی کەرکووک-گەرمیانی پارتی بە ئاڤا میدیای گوت: دوو بارەگای ناوچە لە کەرکووک دەکەینەوە، یەکێکیان لە داقوق ئەوەی دیکەیان لە لەیلان، هەروەها ڕۆژی شەممە 11-10-2025 کەرنەڤاڵی جەماوەری ناساندنی کاندیدیەکانی بازنەی کەرکووک ئەنجام دەدەین.

 

-  گەڕانەوەی کەرکووک زۆر شتی لە پارێزگاکە گۆڕیوە و بۆ هەموو لایەکمان دووپات کردەوە پەیامی ئێمە  ئاشتی و برایەتی و پێکەوەژیانە.

- هەموومان پێکەوە دەتوانین خزمەتی کەرکووک بکەین و پێویستە دادپەروەری لە دابەشکردنی پۆستەکان هەبێت، بە داخەوە ئێستا ئەو دادپەروەرییە نییە.

- دەنگەکانی ئێمە لە کەرکووک زیاد دەکات و هەموو هەڤاڵانمان ئاگادار کردووەتەوە بانگەشەیەکی ئارام بکەن و خۆمان بەدوور دەگرین لە هەموو ئاڵۆزییەک و قسەیەکی زبر.

-  ئەم شێوازەی هەڵبژاردنە بۆ کورد باش نییە، چونکە چەند دەنگ بهێنین ڕێژەی کورسییەکانی پارێزگاکان دیاری کراوە، ئەگەر عێراق یەک بازنە بێت ژمارەی کورسییەکانمان زیاتر دەبێت.

- تێبینیمان لەسەر ڕەوشی کەرکووک هەیە، زۆرشت داگیرکراوە و لە هەوڵەکانمان بەردەوامن بۆ ئەوەی ئەو داگیرکارییەن نەمێنێت.